ព្យុះត្រូពិកថ្មីមួយបានវាយប្រហារកោះ ម៉ាយ៉ត់ (Mayotte) របស់ប្រទេសបារាំង ក្នុងមហាសមុទ្រឥណ្ឌា កាលពីថ្ងៃសៅរ៍ (១១ មករា) ត្រឹមតែប៉ុន្មានសប្តាហ៍ប៉ុណ្ណោះ បន្ទាប់ពីព្យុះស៊ីក្លូនដ៏កាចសាហាវ ដែលបានសម្លាប់មនុស្សយ៉ាងហោចណាស់ ៣៩នាក់ និងបានធ្វើឱ្យមនុស្សជាង ២០០នាក់នៅតែបាត់ខ្លួន។

ប្រជុំកោះ ដែលស្ថិតនៅឆ្នេរសមុទ្រភាគខាងកើតនៃទ្វីបអាហ្រ្វិករវាងម៉ាដាហ្គាស្ការ និងឆ្នេរសមុទ្រនៃប្រទេសម៉ូហ្សំប៊ិកមួយនេះ ទើបតែចាប់ផ្តើមដំណើរការសាងសង់ឡើងវិញ បន្ទាប់ពីការបំផ្លិចបំផ្លាញនៃព្យុះស៊ីក្លូន ឈីដូ (Chido) កាលពីថ្ងៃទី១៤ ខែធ្នូ ឆ្នាំ២០២៤ ប៉ុន្តែឥឡូវនេះត្រូវរងទុក្ខក្នុងគ្រោះធម្មជាតិមួយផ្សេងទៀត។

តំបន់មួយចំនួនបានរាយការណ៍ពីទឹកជំនន់កាលពីថ្ងៃសៅរ៍ ហើយការប្រកាសអាសន្នពណ៌ក្រហមត្រូវបានដាក់ចេញឱ្យប្រជាជនស្នាក់នៅក្នុងផ្ទះសម្បែងរបស់ពួកគេ ឬស្វែងរកទីជម្រកដ៏រឹងមាំ ខណៈព្យុះត្រូពិក ឌីកេឡេឌី (Dikeledi) បានខិតជិតមកដល់។ យោងតាមសេវាឧតុនិយមបារាំងបានឱ្យដឹងថា ព្យុះបាននាំមកនូវភ្លៀងធ្លាក់ និងខ្យល់បក់ខ្លាំង ទោះបីជាផ្នែកកណ្តាលនៃព្យុះនេះ ឆ្លងកាត់ត្រឹមប្រហែល ១០០គីឡូម៉ែត្រ ភាគខាងត្បូងនៃកោះ Mayotte ក៏ដោយ។

អាជ្ញាធរក្នុង Mayotte បាននិយាយថា មានគ្រោះថ្នាក់ខ្ពស់នៃទឹកជំនន់ និងបំណាក់ដីនៅទូទាំងកោះ។ ការប្រកាសអាសន្នពណ៌ក្រហមនៅតែមានប្រសិទ្ធភាពរហូតដល់ល្ងាចថ្ងៃចន្ទ ១៣ មករា នេះ។ ក្រសួងមហាផ្ទៃបារាំងនិយាយថា បុគ្គលិកសង្គ្រោះបន្ទាន់ និងកម្លាំងសន្តិសុខត្រូវបានដាក់ពង្រាយទប់ទល់ព្យុះ Dikeledi មួយនេះ៕