ក្រសួងអប់រំ យុវជន និងកីឡារំកិលកាលបរិច្ឆេទប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) ទៅថ្ងៃទី២៧ ខែធ្នូ ឆ្នាំ២០២១ដោយរៀបចំតាមទម្រង់ដូចឆ្នាំកន្លងមក។ នេះបើតាមការបញ្ជាក់របស់ឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និងកីឡា ថ្លែងប្រាប់BTV នៅយប់ថ្ងៃទី០៥ ខែវិច្ឆិកា ឆ្នាំ២០២១នេះ ។ ការសម្រេចនេះធ្វើឡើងក្នុងកិច្ចប្រជុំរបស់ ថ្នាក់ដឹកនាំក្រសួងអប់រំ យុវជន និងកីឡា ដែលបានប្រជុំវាយតម្លៃស្ថានការណ៏ ដើម្បីបន្តរៀបចំការប្រឡងបាក់ឌុប នារសៀលថ្ងៃ០៥ វិច្ឆិកា ២០២១។

ឯកឧត្តម រស់ សុវាចា បន្តថា «ក្រសួងអប់រំ យុវជន និងកីឡា បានសម្រេចកំណត់យកថ្ងៃ២៧ ធ្នូ ២០២១ ជាសម័យប្រឡងបាក់ឌុប។ ការប្រឡងបាក់ឌុប ត្រូវបន្តអនុវត្តន៍គោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ស្របនឹងវិធានការសុវត្ថិភាពសុខភាព។»

សូមបញ្ជាក់ថា កាលបរិច្ឆេទកន្លងទៅក្រសួងធ្លាប់បានសម្រេចកំណត់យកថ្ងៃទី៦ ខែធ្នូ ជាសម័យប្រឡងបាក់ឌុប ហើយថ្មីៗនេះក៏ធ្លាប់បង្ហើបពីការពិចារណាលើកពេលប្រឡងនេះដែរ ដើម្បីទុកពេលវេលាអោយបានច្រើនសម្រាប់សិស្សានុសិស្សថ្នាក់ទី១២ ត្រៀមខ្លួន។ ដោយឡែកការប្រឡងសញ្ញាបត្រមធ្យមសិក្សាបឋមភូមិ(ថ្នាក់ទី៩) រក្សាកាលបរិច្ឆេទ នៅថ្ងៃទី១៥ ខែវិច្ឆិកា ឆ្នាំ២០២១ដដែល និងបវេសនកាលឆ្នាំសិក្សា២០២១-២០២២ នឹងចាប់ផ្តើមនៅថ្ងៃទី១០ ខែមករា ឆ្នាំ២០២២៕