ក្រុមអ្នកវិភាគ និងពាណិជ្ជករ បាននិយាយនៅថ្ងៃចន្ទ ទី១៣ ខែមករា ថា ការដាក់ទណ្ឌកម្មរបស់សហរដ្ឋអាមេរិក លើឧស្សាហកម្មប្រេងរបស់រុស្ស៊ី នឹងធ្វើឱ្យតម្លៃកាន់តែឡើងខ្ពស់សម្រាប់ទីក្រុងមូស្គូក្នុងការលក់ប្រេងរបស់ខ្លួន និងធ្វើឱ្យស្មុគស្មាញដល់ការនាំចេញប្រេងពីសមុទ្រ ដោយសារតែការរឹតបន្តឹងលើនាវាដឹកប្រេង។

រដ្ឋបាលប្រធានាធិបតីសហរដ្ឋអាមេរិក លោក Joe Biden បានបង្ហាញវិធានការ ដែលដាក់គោលដៅលើប្រាក់ចំណូលពីប្រេង និងឧស្ម័នរបស់រុស្ស៊ី ក្នុងកិច្ចខិតខំប្រឹងប្រែងដើម្បីផ្តល់ឱ្យទីក្រុងគីវ និងក្រុមដែលនឹងចូលកាន់តំណែងនៅពេលខាងមុខរបស់លោក Donald Trump ក្នុងការឈានដល់កិច្ចព្រមព្រៀងសន្តិភាពនៅអ៊ុយក្រែន។

រហូតមកដល់ពេលនេះ សហរដ្ឋអាមេរិក បានប្រុងប្រយ័ត្នចំពោះការធ្វើឲ្យភ្ញាក់ផ្អើលទីផ្សារប្រេងពិភពលោក ហើយរុស្ស៊ីបានគេចវេសពីទណ្ឌកម្មរបស់លោកខាងលិចដោយជោគជ័យ លើប្រេងរបស់ខ្លួន ដូចជាការទប់តម្លៃប្រេងដែលត្រូវបានដាក់ដោយក្រុមប្រទេសមានសេដ្ឋកិច្ចរីកលូតលាស់ទាំងប្រាំពីរ(G7) ក្នុងឆ្នាំ២០២២ និងការលក់ក្នុងបរិមាណដ៏ច្រើនទៅឲ្យប្រទេសចិន និងឥណ្ឌា។

តម្លៃប្រេង បានហក់ឡើងប្រហែល៦ភាគរយចាប់តាំងពីថ្ងៃទី៨ ខែមករា ដោយបានកើនឡើងកាលពីថ្ងៃសុក្រ បន្ទាប់ពីការដាក់ទណ្ឌកម្មចុងក្រោយត្រូវបានណែនាំ។

វិមានក្រឹមឡាំង បាននិយាយថា ទណ្ឌកម្មនេះ មានហានិភ័យចំពោះអស្ថិរភាពទីផ្សារពិភពលោក ហើយទីក្រុងមូស្គូ នឹងធ្វើអ្វីគ្រប់យ៉ាងដែលអាចធ្វើទៅបាន ដើម្បីប្រឆាំងទណ្ឌកម្ម។