លោក Yotam Vilk និយាយថា រូបភាពនៃទាហានអ៊ីស្រាអែលដែលសម្លាប់ក្មេងជំទង់ប៉ាឡេស្ទីន ដោយគ្មានអាវុធ នៅតំបន់ហ្កាហ្សាស្ទ្រីប ត្រូវបានដក់ជាប់ក្នុងចិត្តរបស់ខ្លួន។

ក្នុងនាមជាមន្ត្រីម្នាក់ នៅក្នុងអង្គភាពរថពាសដែក លោក Vilk បាននិយាយថា ការណែនាំ គឺត្រូវបាញ់សម្លាប់មនុស្សណាដែលគ្មានការអនុញ្ញាត ដែលចូលទៅក្នុងតំបន់ទ្រនាប់គ្រប់គ្រងដោយអ៊ីស្រាអែល នៅក្នុងតំបន់ហ្កាហ្សា។ លោកបានអះអាងថា ខ្លួនបានឃើញមនុស្សយ៉ាងតិច ១២ នាក់ បានស្លាប់ ប៉ុន្តែវាជាការបាញ់សម្លាប់ក្មេងជំទង់ ដែលលោកមិនអាចចៀសផុត។

លោក Vilk អាយុ ២៨ឆ្នាំ បានប្រាប់សារព័ត៌មាន AP ថា៖«ក្មេងជំទង់នេះ បានស្លាប់ ជាផ្នែកនៃរឿងមួយ ដ៏ធំ ហើយជាផ្នែកនៃគោលនយោបាយនៃការបន្តនៅទីនោះ និងមិនឃើញជនជាតិប៉ាឡេស្ទីន ជាប្រជាជននោះទេ»។

លោក Vilk ស្ថិតក្នុងចំណោមទាហានអ៊ីស្រាអែលដែលនិយាយប្រឆាំងនឹងជម្លោះរយៈពេល ១៥ខែ ហើយបដិសេធមិនបម្រើការងារនេះតទៅទៀតទេ ដោយនិយាយថា ពួកគេបានឃើញ ឬធ្វើអ្វីដែលហួសពីក្រមសីលធម៌។ ខណៈពេលដែលចលនានេះ គឺតូច គឺទាហានប្រហែល ២០០នាក់ បានចុះហត្ថលេខាលើលិខិតមួយ ដែលបញ្ជាក់ថា ពួកគេនឹងបញ្ឈប់ការប្រយុទ្ធ ប្រសិនបើរដ្ឋាភិបាលមិនទទួលបានបទឈប់បាញ់ ទាហានបាននិយាយថា ស្ថានភាព គឺកាន់តែអាក្រក់ឡើងៗ ហើយពួកគេចង់ឲ្យអ្នកផ្សេងទៀត បន្តដំណើរការទៅមុខ។

ការបដិសេធរបស់ពួកគេ កើតឡើង នៅពេលដែលមានសម្ពាធកាន់តែខ្លាំងលើអ៊ីស្រាអែល និងក្រុមហាម៉ាស ឲ្យបញ្ចប់ការប្រយុទ្ធគ្នា។ កិច្ចចរចាបទឈប់បាញ់ កំពុងដំណើរការ ហើយទាំងប្រធានាធិបតី ចូ បៃ ដិន (Joe Biden) និងប្រធានាធិបតីជាប់ឆ្នោត លោក ដូណាល់ ត្រាំ (Donald Trump) បានអំពាវនាវឲ្យមានកិច្ចព្រមព្រៀងមួយ នៅត្រឹមថ្ងៃទី ២០ ខែមករា ដែលជាថ្ងៃស្បថចូលកាន់តំណែងរបស់លោក។