នៅថ្ងៃអង្គារនេះ ជនប៉ាឡេស្ទីនរស់នៅក្នុងទីក្រុង Khan Younis បានតាមដានព័ត៌មានយ៉ាងដិតដល់ និងដោយអត់ធ្មត់ ពេលដែលក្តីសង្ឃឹមកើតមានសម្រាប់បទឈប់បាញ់តំបន់ហ្កាហ្សា ក្រោយអ្នកសម្របសម្រួល រាយការណ៍ពីការទម្លុះភាពទាល់ច្រកកាលពីពាក់កណ្តាលយប់អាធ្រាត្រកន្លងទៅ នៅកិច្ចប្រជុំក្នុងទីក្រុងដូហា ប្រទេសកាតា ។

លោក Yahya Rashid គឺជាពលរដ្ឋជម្លៀសខ្លួនមួយរូបនៅទីក្រុងហ្កាហ្សា និយាយថា ជនប៉ាឡេស្ទីន ត្រូវការចង់សម្រាកខ្លាំងបំផុត ខណៈអ្នកជួយសង្រ្គោះលោក Nassim Hassan បានរៀបរាប់ពីភាពអន្ទះសារខ្លាំងបែបណា ពេលដែលជនប៉ាឡេស្ទីន កំពុងរង់ចាំដោយអត់ធ្មត់សម្រាប់ការប្រកាសបទឈប់បាញ់ ។

ក្រុមអ្នកចរចា ជួបជុំគ្នានៅទីក្រុងដូហា នាថ្ងៃអង្គារនេះ ដើម្បីបញ្ចប់រឿងរ៉ាវលម្អិតនៃផែនការបញ្ចប់សង្រ្គាមនៅតំបន់ហ្កាហ្សា ដែលបានធ្វើឲ្យរង្គោះរង្គើរយ៉ាងខ្លាំងដល់តំបន់មជ្ឈិមបូព៌ា ក្រោយប្រធានាធិបតីជិតចាកចេញពីអំណាចសហរដ្ឋអាមេរិកលោក Joe Biden ចង្អុរបង្ហាញថា បទឈប់បាញ់ និងកិច្ចព្រមព្រៀងដោះលែងចំណាប់ថ្នូរជិតកើតមានហើយ ។

មន្ត្រីមួយរូបដែលរៀបរាប់សង្ខេបពីការចរចា និយាយថា កាលពីថ្ងៃចន្ទម្សិលមិញ ក្រុមអ្នកសម្របសម្រួល បានផ្តល់សំណើច្បាប់ចុងក្រោយនៃកិច្ចព្រមព្រៀង ក្រោយការទម្លុះភាពទាល់ច្រកកាលពីពាក់កណ្តាលយប់អាធ្រាត្រ នៅក្នុងកិច្ចប្រជុំដែលមានការចូលរួមពីប្រេសិតពិសេសរបស់លោក Biden និងប្រធានាធិបតីជាប់ឆ្នោតសហរដ្ឋអាមេរិកលោក Donald Trump ។

បើសិនជាជោគជ័យពិតមែន បទឈប់បាញ់តាមដំណាក់កាលនេះ អាចបញ្ចប់កិច្ចពិភាក្សាចាប់ផ្តើម ហើយឈប់រយៈពេល ១ឆ្នាំ និងនាំឲ្យមានការដោះលែងចំណាប់ថ្នូរអ៊ីស្រាអែលច្រើនបំផុត ចាប់តាំងពីពេលដំបូងនៃជម្លោះ ពេលដែលក្រុមហាម៉ាស់ ដោះលែងចំណាប់ថ្នូរប្រហែលជិតពាក់កណ្តាល ជាការដោះដូរនឹងអ្នកទោសប៉ាឡេស្ទីន ២៤០នាក់ ជាប់ឃុំឃាំងក្នុងពន្ធនាគារអ៊ីស្រាអែល ។ វាអាចបន្ធូរបន្ថយភាពតានតឹងនៅតំបន់មជ្ឈិមបូព៌ាផងដែរ ជាទីដែលសង្រ្គាមបានសម្លាប់មនុស្សរាប់ម៉ឺននាក់ និងធ្វើឲ្យតំបន់ហ្កាហ្សា ក្លាយជាកម្ទេចកម្ទី ៕