អាជ្ញាធរកូរ៉េខាងត្បូងដែលកំពុងស៊ើបអង្កេតលោកប្រធានាធិបតី Yoon Suk Yeol ត្រូវបានចោទប្រកាន់ទម្លាក់តំណែង បានសម្រុកចូលក្នុងគេហដ្ឋានរបស់លោកជាថ្មីទៀតនៅថ្ងៃពុធ១៥ មករានេះ ក្នុងការស្វះស្វែងចាប់ខ្លួនលោកជាថ្មីជុំវិញការចោទប្រកាន់ពីបទបះបោរពាក់ព័ន្ធការប្រកាសច្បាប់អាជ្ញាសឹកកាលពីថ្ងៃទី៣ ខែធ្នូឆ្នាំ២០២៤កន្លងទៅនេះ។

មន្ត្រីម្នាក់មកពីកម្លាំងចម្រុះដែលកំពុងព្យាយាមចាប់ខ្លួនលោក Yoon បាននិយាយថា ក្រុមអ្នកស៊ើបអង្កេតបានព្យាយាមអនុវត្តដីកាថ្មីមួយទៀត។

មន្ត្រីម្នាក់មកពីការិយាល័យស៊ើបអង្កេតអំពើពុករលួយដែលស៊ើបអង្កេតលើក្រឹត្យច្បាប់អាជ្ញាសឹក បរាជ័យរបស់លោក Yoon បានប្រាប់អ្នកសារព័ត៌មានថាយើងមិនដឹងចំនួនពិតប្រាកដនៃមនុស្សនៅក្នុងគេហដ្ឋាននោះទេ ប៉ុន្តែក្នុងចំណោមនោះក៏មានក្រុមរដ្ឋអាជ្ញាផងដែរ។

ទីភ្នាក់ងារព័ត៌មាន Yonhap បានរាយការណ៍ថា ក្រុមអ្នកស៊ើបអង្កេតនៅថ្ងៃពុធនេះ បានចាប់ខ្លួនប្រធានស្តីទីនៃសេវាសន្តិសុខប្រធានាធិបតីរបស់លោក Yoon ដែលបានរារាំងការប៉ុនប៉ងចាប់ខ្លួនលោកប្រធានាធិបតីកាលពីថ្ងៃទី ៣ ខែមករា២០២៥នេះ។ យ៉ាងណាអ្នកនាំពាក្យនគរបាលបានបដិសេធរបាយការណ៍នោះ។

ស្របពេលសារព័ត៌មានក្នុងស្រុកនានាបានរាយការណ៍ថា ការឃុំខ្លួនលោក Yoon អាចនឹងកើតមានក្នុងពេលឆាប់ៗនេះ ការប៉ះទង្គិចគ្នាបន្តិចបន្តួចបានផ្ទុះឡើងរវាងក្រុមបាតុករគាំទ្រលោក Yoon ដែលបានស្រក់ទឹកភ្នែក និងកងកម្លាំងនគរបាលនៅជិតលំនៅដ្ឋានរបស់លោក។

រូបភាពវីដេអូមុនពេលព្រឹកព្រលឹមថ្ងៃពុធ បានបង្ហាញឱ្យឃើញមន្ត្រីនគរបាលរាប់រយនាក់ ខ្លះកាន់កាំជណ្ដើរ និងកន្ត្រៃកាត់ខ្សែលួស ដើរតាមផ្លូវឆ្ពោះទៅផ្ទះវីឡានៅលើភ្នំជាទីដែលលោក Yoon ត្រូវបានពួនសំងំអស់រយៈពេលជាច្រើនសប្តាហ៍ក្រោមការយាមកាមពីកងកម្លាំងសន្តិសុខផ្ទាល់ខ្លួនមួយចំនួនតូចរបស់លោក៕