អស់រយៈពេលជាច្រើនឆ្នាំមកហើយ រដ្ឋាភិបាលសហរដ្ឋអាមេរិក បានជំរុញប្រទេសចិនឲ្យបង្ហាញនូវ «ការអត់ធ្មត់» ក្នុងការជំរុញដល់ការអះអាងសិទ្ធិរបស់ខ្លួន លើកោះតៃវ៉ាន់ ហើយទម្លាក់ចោលការគំរាមកំហែងផ្នែកយោធា ដើម្បីក្រសោបយកកោះស្វ័យគ្រប់គ្រងតាមបែបប្រជាធិបតេយ្យមួយនេះ។

ឥឡូវនេះ អ្នកវិភាគចិនមួយចំនួន បានលើកឡើងថា ឥទ្ធិពលនៃសាររបស់សហរដ្ឋអាមេរិកដែលមានជាយូរមកហើយនោះ ត្រូវបានសាបរលាប ដោយសារការគំរាមកំហែងរបស់ប្រធានាធិបតីជាប់ឆ្នោតអាមេរិក លោក Donald Trump ដែលចង់កាន់កាប់ដែនដី Greenland និងព្រែកជីកប៉ាណាម៉ា ដោយបង្ខំ ប្រសិនបើចាំបាច់។ លោក Trump ត្រូវចូលកាន់តំណែងផ្លូវការ នៅថ្ងៃទី២០ ខែមករានេះ។

ផលប៉ះពាល់នៃការអត្ថាធិប្បាយរបស់លោក Trump ចំពោះគោលនយោបាយរបស់សហរដ្ឋអាមេរិកលើកោះតៃវ៉ាន់ ត្រូវបានលើកយកមកជជែកវែកញែកយ៉ាងទូលំទូលាយ នៅលើបណ្ដាញសង្គមរបស់ប្រទេសចិន ក្នុងរយៈពេលប៉ុន្មានថ្ងៃថ្មីៗនេះ និងដោយអ្នកវិភាគគោលនយោបាយការបរទេស។

ទោះបីជាការប្រែប្រួលធំដុំ នៅក្នុងការប្រឈមមុខដាក់គ្នាផ្នែកយោធា ជុំវិញបញ្ហាកោះតៃវ៉ាន់ ទំនងជានឹងមិនកើតមាន ក្នុងរយៈពេលដ៏ខ្លីនេះក៏ដោយ ក៏អ្នកវិភាគមួយចំនួន លើកឡើងថា ការផ្លាស់ប្ដូររបស់លោក Trump ពីបទដ្ឋានការទូតអាមេរិក អាចបង្កើតឱកាស សម្រាប់ប្រទេសចិន។

អ្នកជំនាញចិនម្នាក់ បាននិយាយថា ការកាន់តំណែងអាណត្តិដំបូងរបស់លោក Trump ជាសញ្ញាថា លោកចាត់ទុកគោលនយោបាយការបរទេសថា ជាប្រតិបត្តិការមានការប្រែប្រួលធម្មតា ហើយបានលើកឡើងថា លោកអាចនឹងមានភាពបត់បែន ចំពោះកិច្ចព្រមព្រៀង ស្តីពីកោះតៃវ៉ាន់។

សាស្ត្រាចារ្យមួយរូប ឈ្មោះ Zhao Minghao នៃវិទ្យាស្ថានសិក្សាអន្តរជាតិ នៅសកលវិទ្យាល័យ Fudan ក្នុងទីក្រុងសៀងហៃ បាននិយាយថា ការគំរាមរបស់លោក Trump ក្នុងការចង់គ្រប់គ្រងដែនដី Greenland ព្រែកជីក Panama និងសូម្បីតែបញ្ចូលប្រទេសកាណាដាជារដ្ឋរបស់អាមេរិក ចាំបាច់ត្រូវយកមកគិតគូរឲ្យបានប្រាកដប្រជា។

យ៉ាងណាក្ដី ក្រសួងការបរទេសចិន បានជំទាស់ថា វាជារឿងមិនសមហេតុផលនោះឡើយ ក្នុងការព្យាយាមភ្ជាប់ស្ថានភាពរបស់ដែនដី Greenland ទៅនឹងកោះតៃវ៉ាន់។ នៅក្នុងសេចក្តីថ្លែងការណ៍មួយផ្ញើទៅកាន់សារព័ត៌មាន Reuters ក្រសួងបានលើកឡើងថា៖ «កោះតៃវ៉ាន់ គឺជាបញ្ហាផ្ទៃក្នុងរបស់ប្រទេសចិន ហើយរបៀបដោះស្រាយ គឺជាអ្វី ដែលប្រជាជនចិនត្រូវសម្រេច»៕