ភពដីក្រហម ឬភពព្រះអង្គារ នឹងបង្ហាញខ្លួនយ៉ាងខ្ពស់ត្រដែតពីលើប្រទេសសិង្ហបុរីនៅថ្ងៃព្រហស្បតិ៍ ទី ១៦ ខែមករាស្អែកនេះ ពេលដែលវាបង្ហាញខ្លួនច្បាស់ជាងពេលណាៗទាំងអស់ក្នុងឆ្នាំនេះ ខណៈដែលមានផ្ទៃមេឃស្រឡះល្អ ។

ព្រឹត្តិការណ៍តារាសាស្ត្រដែលគេស្គាល់ថា “ភពព្រះអង្គារនៅទល់មុខគ្នា” កើតឡើងពេលដែលផែនដីឆ្លងកាត់ដោយផ្ទាល់ចន្លោះភពមួយនេះ និងព្រះអាទិត្យ ។

មជ្ឈមណ្ឌលសង្កេតការណ៍វិទ្យាសាស្រ្តសិង្ហបុរី និយាយថា អំឡុងពេលនោះ ភពព្រះអង្គារ នឹងខិតជិតបំផុតនឹងផែនដី ហើយគេនឹងមើលវាឃើញពេញដោយសារចំណាំងផ្លាត់ពន្លឺពីព្រះអាទិត្យ ។

ព្រឹត្តិការណ៍តារាសាស្ត្រមួយនេះ ធ្លាប់កើតឡើងលើកចុងក្រោយកាលពីថ្ងៃទី ៨ ខែធ្នូ ឆ្នាំ ២០២២ ហើយគេនឹងមើលឃើញវាម្តងទៀត នៅថ្ងៃទី ១៩ ខែកុម្ភៈ ឆ្នាំ ២០២៧ ហើយបន្ទាប់មកនៅថ្ងៃទី ១៥ ខែមីនា ឆ្នាំ ២០២៩ ។

មជ្ឈមណ្ឌលសង្កេតការណ៍វិទ្យាសាស្រ្តសិង្ហបុរី បាននិយាយទៀតថា ភពព្រះអង្គារ នឹងចាប់ផ្តើមរះនៅវេលាម៉ោង ៧ និង ៣០នាទី យប់ថ្ងៃទី ១៦ ខែមករា ហើយវាកាន់តែមើលឃើញច្បាស់នៅវេលាម៉ោង ៨ និង៣០នាទីយប់ ជាពិសេសនៅពេលផ្ទៃមេឃងងឹត ហើយវានឹងរះត្រង់ នៅវេលាម៉ោង ១ យប់រំលងអាធ្រាត្រឈានចូលដល់ថ្ងៃទី ១៧ ខែមករា ៕