ប្រជាជនប៉ាឡេស្ទីន និងអ៊ីស្រាអែល បានអបអរយ៉ាងរីករាយនៅទូទាំងតំបន់ហ្កាហ្សាស្ទ្រីប កាលពីថ្ងៃពុធ (១៥ មករា) នៅពេលបានដឹងដំណឹងនៃការឈានដល់បទឈប់បាញ់រវាងអ៊ីស្រាអែល និងក្រុមហាម៉ាស ដោយអ្នកខ្លះបានសម្រក់ទឹកភ្នែកទាំងក្ដីរីករាយ និងស្ទើតែមិនជឿថាអាចធូរស្រាលពីការទម្លាក់គ្រាប់បែក ហើយអ្នកខ្លះទៀតហួច ទះដៃ និងស្រែកអរគុណព្រះជាម្ចាស់របស់ពួកគេ។

ជនភៀសខ្លួនជាច្រើននៅទីក្រុងហ្កាហ្សា ក្នុងអំឡុងពេលជម្លោះអាយុកាល ១៥ខែនេះបាននិយាយថា "យើងសប្បាយចិត្តឡើងយំហើយ ប៉ុន្តែជាទឹកភ្នែកនៃសេចក្តីរីករាយ។ ពេលនេះ យើងដូចកើតម្ដងទៀតអញ្ចឹង" ។

យុវជនវាយស្គរ ផ្លុំស្នែង និងរាំនៅតាមដងផ្លូវក្នុងទីក្រុង Khan Younis នៅភាគខាងត្បូងនៃតំបន់ហ៊ុមព័ទ្ធ ប៉ុន្មាននាទីប៉ុណ្ណោះបន្ទាប់ពីឮដំណឹងអំពីកិច្ចព្រមព្រៀងត្រូវបានសម្រេចក្នុងរដ្ឋធានីដូហា ប្រទេសកាតា។

នៅអ៊ីស្រាអែល មនុស្សម្នាជាច្រើន ជាពិសេសក្រុមគ្រួសារចំណាប់ថ្នូរ បានស្រែកហ៊ោរអបអរយ៉ាងសប្បាយចិត្ត ពេលដឹងថាមនុស្សជាទីស្រឡាញ់របស់ពួកគេជិតត្រឡប់មកវិញ។

កិច្ចព្រមព្រៀងដែលមិនទាន់បានប្រកាសជាផ្លូវការនោះ បង្ហាញពីដំណាក់កាលឈប់បាញ់ដំបូងរយៈពេល ៦សប្តាហ៍ និងរួមបញ្ចូលទាំងការដកកងកម្លាំងអ៊ីស្រាអែលបន្តិចម្តងៗចេញពីតំបន់ហ្កាហ្សា។ កិច្ចព្រមព្រៀងនេះក៏ផ្តល់ផងដែរនូវការដោះលែងចំណាប់ថ្នូរដែលក្រុមហាម៉ាសឃុំខ្លួន ជាថ្នូរនឹងអ្នកទោសប៉ាឡេស្ទីន ដែលអ៊ីស្រាអែលឃុំឃាំង នេះបើតាមមន្ត្រីដែលដឹងពីកិច្ចចរចាបានប្រាប់សារព័ត៌មានរ៉យទ័រ៕