ការស្ទង់មតិរបស់វេទិកាសេដ្ឋកិច្ចពិភពលោក ឬហៅថាកិច្ចប្រជុំ WEF ដែលបានចេញផ្សាយកាលពីថ្ងៃពុធ (១៥ មករា) បានបង្ហាញថា ជម្លោះប្រដាប់អាវុធគឺជាក្ដីកង្វល់ធំបំផុតនៅឆ្នាំ២០២៥ ជាការក្រើនរំលឹកថាពិភពលោកកំពុងបែកបាក់កាន់តែខ្លាំង នៅពេលរដ្ឋាភិបាលនានា និងមេដឹកនាំអាជីវកម្ម ត្រៀមចូលរួមក្នុងការជួបជុំប្រចាំឆ្នាំនៅទីក្រុង Davos របស់ប្រទេសស្វីស ក្នុងសប្តាហ៍ក្រោយ។

ជិតមួយភាគបួនក្នុងចំនោមអ្នកជំនាញជាង ៩០០នាក់ ដែលបានស្ទង់មតិនៅទូទាំងស្ថាប័នសិក្សា អាជីវកម្ម និងក្រុមបង្កើតគោលនយោបាយ បានដាក់ចំណាត់ថ្នាក់ជម្លោះ រួមទាំងសង្គ្រាម និងអំពើភេរវកម្ម ថាជាហានិភ័យធ្ងន់ធ្ងរបំផុតចំពោះកំណើនសេដ្ឋកិច្ចសម្រាប់ឆ្នាំខាងមុខ។ បញ្ហាអាកាសធាតុធ្ងន់ធ្ងរ ដែលធ្លាប់ជាប់លេខ១ ថាជាក្ដីបារម្ភចម្បងក្នុងឆ្នាំ២០២៤ ពេលនេះជាកង្វល់លំដាប់ទីពីរ។

កិច្ចប្រជុំ WEF ចាប់ផ្តើមដំណើរការនៅថ្ងៃទី២០ ខែមករា ហើយលោកប្រធានាធិបតីជាប់ឆ្នោត Donald Trump ដែលនឹងស្បថចូលកាន់តំណែងជាប្រធានាធិបតីទី៤៧ របស់អាមេរិកនៅថ្ងៃដូចគ្នានោះ នឹងថ្លែងសុន្ទរកថានៅក្នុងកិច្ចប្រជុំតាមអនឡាញនៅថ្ងៃទី២៣ ខែមករា។ អ្នករៀបចំកម្មវិធីនិយាយថា ប្រធានាធិបតីអ៊ុយក្រែន លោក Volodymyr Zelenskiy ក៏នឹងចូលរួមកិច្ចប្រជុំនោះ និងថ្លែងសុន្ទរកថានៅថ្ងៃទី២១ ខែមករា។

លោក ប៊័រហ្គេ ប្រេនដេ (Borge Brende) ប្រធាន និងនាយកប្រតិបត្តិវេទិកា WEF បានឱ្យដឹងថា ស៊ីរី "ស្ថានភាពមនុស្សធម៌ដ៏អាក្រក់នៅហ្កាហ្សា" និងលទ្ធភាពនៃកំណើនជម្លោះនៅមជ្ឈិមបូព៌ា នឹងក្លាយជាការផ្តោតអារម្មណ៍នៅក្នុងកិច្ចប្រជុំនេះ៕