​ចិន៖ អវកាសយានិក​ពីរ​នាក់​មកពី​យានអវកាស Shenzhou-13 របស់​ប្រទេស​ចិនបាន​ចាប់ផ្ដើម​ដើរ​លើ​លំហ​អាកាស​កាលពី​យប់​ថ្ងៃអាទិត្យ ចេញពី​ស្ថានីយ​គន្លង​គោចរ​របស់​ប្រទេស​ចិនជា​លើកដំបូង​ ចាប់​តាំង​ពី​ពួកគេ​ត្រូវ​បាន​បញ្ជូន​ទៅ​កាន់​តារា​វិថី​កាលពី ​៣សប្ដាហ៍​មុន​។

​យោង​តាម​ការិយាល័យ​វិស្វកម្ម​អវកាស​ចិន (CMSEO) បាន​ឱ្យ​ដឹង​ថា លោក Zhai Zhigang បាន​ឡើង​ចេញ​តាម​គម្រប​យានអវកាស​នៅ​ម៉ោង ៦:៥១​ល្ងាច​ម៉ោង​នៅ​ទីក្រុង​ប៉េកាំង ហើយ​លោកស្រី Wang Yaping បាន​ចេញ​តាម​ក្រោយ​នៅ​ម៉ោង ៨:២៨​យប់​ម៉ោង​នៅ​ទីក្រុង​ប៉េកាំង​។ សមាជិក​អវកាសយានិក​ទី​៣ គឺ​លោក Ye Guangfu បាន​ស្នាក់​នៅ​ក្នុង​បន្ទប់​ម៉ូឌុល​ស្នូល ដើម្បី​ជួយ​ដល់​សកម្មភាព​​វាលលំហ​ក្រៅ​យានអវកាស ដែល​ទីភ្នាក់ងារ​អវកាស​បាន​និយាយ​ថា នឹង​បន្ត​រយៈពេល​ប្រហែល ៦​ម៉ោង​។ លោក Zhai និង​លោកស្រី Wang នឹង​ដំឡើង​ឧបករណ៍​ទប់​ជើង និង​កៅអី​ធ្វើការ​លើ​ដៃ​រូបយន្ត​។ បន្ទាប់មកដោយមាន​ការ​គាំទ្រ​ពី​ដៃ​របស់​រូបយន្ត អ្នក​ទាំងពីរ​នឹង​ដំឡើង​ឌុយ ឬ​អា​ដាប់​ទ័​រ និង​ប្រព័ន្ធ​ព្យួរ​នៅ​លើ​ដៃ​រូបយន្ត​សម្រាប់​ការងារ​នា​ពេល​អនាគត​។ លោក Zhai អាយុ ៥៥​ឆ្នាំ​បាន​ដើរ​លើ​លំហ​លើកដំបូង​ក្នុង​ឆ្នាំ​២០០៨ ដែល​ជា​អវកាសយានិក​ជនជាតិ​ចិន​ដំបូង​គេ​ដែល​ធ្វើ​ដូច្នេះ​។ លោកស្រី Wang អាយុ ៤១​ឆ្នាំ​គឺជា​ស្ត្រី​ដើរ​លំហ​អាកាស​ដំបូង​គេ​របស់​ចិន​។​ អវកាសយានិក​ទាំង ៣នាក់​ត្រូវ​បាន​បញ្ជូន​ទៅកាន់​ស្ថានីយ​អវកាស​អចិន្ត្រៃយ៍​ដំបូង​គេ​របស់​ប្រទេស​ចិន​ឈ្មោះ Tiangong កាលពី​ថ្ងៃ​ទី១៦ ខែ​តុលា​សម្រាប់​បេសកកម្ម​រយៈពេល ​៦​ខែ​៕

អត្ថបទ៖ សុខមាន