ប្រធានាធិបតីកូរ៉េខាងត្បូង លោក Yoon Suk Yeol បានស្នើឱ្យតុលាការក្រុងសេអ៊ូល ពិនិត្យមើលលើការឃុំខ្លួនរបស់លោក ខណៈបដិសេធការសាកសួរជាថ្មីដោយក្រុមអ្នកស៊ើបអង្កេតនៅថ្ងៃព្រហស្បតិ៍ (១៦ មករា) នេះ ជុំវិញការប្រកាសច្បាប់អាជ្ញាសឹករយៈពេលខ្លីរបស់លោក។

លោក Seok Dong-hyeon តំណាងម្នាក់ក្នុងចំណោមមេធាវីលោក Yoon បាននិយាយនៅថ្ងៃព្រហស្បតិ៍ថា ក្រុមអ្នកច្បាប់របស់មេដឹកនាំរូបនេះ បានដាក់សំណើទៅតុលាការកណ្តាលទីក្រុងសេអ៊ូល ឱ្យពិនិត្យមើលភាពស្របច្បាប់នៃការចាប់ខ្លួនលោកប្រធានាធិបតី។

បញ្ហានេះបានកើតឡើងមួយថ្ងៃបន្ទាប់ពីការចាប់ខ្លួនរបស់លោក Yoon ដោយធ្វើឱ្យលោកក្លាយជាប្រធានាធិបតីដំបូងគេនៅក្នុងប្រទេស ដែលត្រូវបានចាប់ខ្លួន។ មេដឹកនាំដែលត្រូវបានចោទប្រកាន់ទម្លាក់តំណែង នឹងប្រឈមការចោទប្រកាន់ពីបទបះបោរជុំវិញក្រឹត្យច្បាប់អាជ្ញាសឹករូបនេះ ត្រូវបានអាជ្ញាធរសាកសួរអស់រយៈពេលជិត ១១ម៉ោងកាលពីថ្ងៃពុធ ប៉ុន្តែបានជ្រើសរើសនៅស្ងៀមមិននិយាយស្ដី។

នៅក្រោមច្បាប់ ជនសង្ស័យផ្នែកព្រហ្មទណ្ឌដែលត្រូវបានចាប់ខ្លួន អាចសុំឱ្យតុលាការពិនិត្យមើលភាពស្របច្បាប់នៃការចាប់ខ្លួនរបស់ពួកគេ។ តុលាការមានពេល ៤៨ម៉ោងក្នុងការពិនិត្យករណីនេះ ហើយប្រសិនបើរកឃើញថាសំណើនោះមានសុពលភាព លោក Yoon នឹងត្រូវដោះលែងពីការឃុំខ្លួនភ្លាមៗ៕