នាយករដ្ឋមន្ត្រីប៉ាឡេស្ទីន លោក Mohammed Mustafa បាននិយាយកាលពីថ្ងៃពុធថា សហគមន៍អន្តរជាតិ នឹងត្រូវរក្សាសម្ពាធលើអ៊ីស្រាអែល បន្ទាប់ពីបទឈប់បាញ់ដែលផ្តល់ក្តីសង្ឃឹម នៅក្នុងតំបន់ហ្កាហ្សា ដូច្នេះប្រទេសនេះ ទទួលយកការបង្កើតរដ្ឋប៉ាឡេស្ទីន។

កិច្ចព្រមព្រៀងបទឈប់បាញ់មួយ ជិតឈានដល់ការបញ្ចប់ បន្ទាប់ពីកិច្ចចរចាដោយប្រយោលនាពេលថ្មីៗនេះរវាងអ៊ីស្រាអែល និងក្រុមហាម៉ាស ដោយរដ្ឋមន្ត្រីការបរទេសអាមេរិកលោក Antony Blinken បាននិយាយកាលពីល្ងាចថ្ងៃអង្គារថា កិច្ចព្រមព្រៀងដើម្បីបញ្ចប់សង្គ្រាម រយៈពេល ១៥ខែ គឺ «ជិតដល់ពេលហើយ»។

លោក Mustafa បាននិយាយមុនពេលសន្និសីទនៅទីក្រុង Oslo ប្រទេសន័រវែសថា៖«បទឈប់បាញ់ដែលយើងកំពុងនិយាយ... កើតឡើង ដោយសារតែសម្ពាធអន្តរជាតិ។ 

លោកបានប្រាប់អ្នកយកព័ត៌មានថា អ៊ីស្រាអែលត្រូវតែ «បង្ហាញអ្វីដែលត្រូវ និងអ្វីដែលខុស ហើយថាអំណាចវេតូស្តីពីសន្តិភាព និងឋានៈរដ្ឋសម្រាប់ប៉ាឡេស្ទីន នឹងមិនត្រូវបានទទួលយក និងអត់ឱនឲ្យតទៅទៀតហើយ»។

លោកបាននិយាយនៅពេលចាប់ផ្តើមនៃកិច្ចប្រជុំលើកទី ៣ នៃសម្ព័ន្ធភាពសកលសម្រាប់ការអនុវត្តដំណោះស្រាយរដ្ឋពីរ ចំពោះជម្លោះអ៊ីស្រាអែល និងប៉ាឡេស្ទីន ដោយបានប្រមូលផ្តុំតំណាងមកពីរដ្ឋ និងអង្គការចំនួន ៨០ នៅទីក្រុង Oslo ។