ក្រុមប្រឹក្សារដ្ឋាភិបាលជប៉ុន នៅថ្ងៃព្រហស្បតិ៍ (១៦ មករា) បានប្រាប់ឲ្យដឹងថា ខ្លួនបានដំឡើងកម្រិតខ្ពស់ជាងមុនបន្តិចនៃការប៉ាន់ស្មានរបស់ខ្លួន ចំពោះប្រូបាប៊ីលីតេ (ភាពចៃដន្យនៃព្រឹត្តិការណ៍) ពាក់ព័ន្ធនឹងការមាន «គ្រោះរញ្ជួយដីធំ ហើយខ្លាំង» រហូតដល់ទៅ ៨២ភាគរយ ក្នុងរយៈពេល ៣០ឆ្នាំខាងមុខ។

អ្នកជំនាញបានលើកឡើងថា ការរញ្ជួយដីបែបនេះ អាចមានកម្រិតបំផ្លិចបំផ្លាញពី ៨ ទៅ ៩រ៉ិចទ័រ បង្កជារលកយក្សស៊ូណាមិ សម្លាប់មនុស្សរាប់សែននាក់ និងបង្កការខូចខាតគិតជាទឹកប្រាក់រាប់ពាន់លានដុល្លារ។

គណៈកម្មាធិការស្រាវជ្រាវគ្រោះរញ្ជួយដី បានប្រាប់ថា ខ្លួនបានដំឡើងការប៉ាន់ស្មានរបស់ខ្លួន អំពីលទ្ធភាពអាចកើតមាននេះ ដល់ចន្លោះពី ៧៥ ទៅ ៨២ភាគរយ ដោយខ្ពស់ជាងចន្លោះពី ៧៤ ទៅ ៨១ភាគរយ សម្រាប់ការព្យាករណ៍កាលពីពេលមុន។

ការប៉ាន់ស្មាននេះមានជាប់ទាក់ទងទៅនឹងអ្វីដែលគេស្គាល់ថា ជាគ្រោះរញ្ជួយដីដ៏មានឥទ្ធិពលដ៏ខ្លាំងក្លា នៅតាមបណ្តោយតំបន់ Nankai Trough ជាជ្រលងក្រោមបាតសមុទ្រប្រវែង ៨០គីឡូម៉ែត្រ ដែលលាតសន្ធឹងស្របឆ្នេរសមុទ្រប៉ាស៊ីហ្វិករបស់ប្រទេសជប៉ុន។

បើយោងតាមទីស្នាក់ការកណ្តាលរបស់រដ្ឋាភិបាល សម្រាប់ការលើកកម្ពស់ការស្រាវជ្រាវគ្រោះរញ្ជួយដី បានឲ្យដឹងថា ក្នុងរយៈពេល ១.៤០០ឆ្នាំកន្លងមក ការរញ្ជួយដី នៅ Nankai Trough បានកើតឡើងរៀងរាល់ពី ១០០ ទៅ ២០០ឆ្នាំ។ កំណត់ត្រាចុងក្រោយបង្អស់ បានកើតឡើងម្ដង នៅឆ្នាំ១៩៤៦។

មន្ត្រីនៃលេខាធិការដ្ឋាននៃគណៈកម្មាធិការស្រាវជ្រាវរញ្ជួយដី បានប្រាប់សារព័ត៌មាន AFP ថា៖ «វាមានរយៈពេល ៧៩ឆ្នាំហើយ ចាប់តាំងពីមានការរញ្ជួយដីលើកចុងក្រោយនេះ ហើយលទ្ធភាពនៃការរញ្ជួយដីមួយទៀត កើតឡើងជារៀងរាល់ឆ្នាំ ក្នុងល្បឿនប្រហែល ១ភាគរយ»។

កាលពីខែសីហាឆ្នាំមុន សមាគមឧតុនិយមជប៉ុន (JMA) បានចេញសេចក្តីណែនាំ អំពីគ្រោះរញ្ជួយដីកម្រិតធំខ្លាំងលើកដំបូងរបស់ខ្លួន ក្រោមច្បាប់ដែលត្រូវបានបង្កើតឡើងបន្ទាប់ពីមានគ្រោះរញ្ជួយដីដ៏បំផ្លិចបំផ្លាញ នៅតំបន់ Tohoku និងរលកយក្សស៊ូណាមិឆ្នាំ២០១១៕