ក្រុមមេធាវីការពារក្ដីលោកប្រធានាធិបតីកូរ៉េខាងត្បូង Yoon Suk Yeol ដែលត្រូវបានចោទប្រកាន់ទម្លាក់តំណែង បានបរាជ័យក្នុងកិច្ចខិតខំប្រឹងប្រែងនៅតុលាការក្នុងការធានាឱ្យមានការដោះលែងរូបលោកកាលពីថ្ងៃព្រហស្បតិ៍សប្ដាហ៍នេះ មួយថ្ងៃបន្ទាប់ពីលោកត្រូវបានឃុំខ្លួនសម្រាប់ការសាកសួរជុំវិញការចោទប្រកាន់ពីបទបះបោរពាក់ព័ន្ធការប្រកាសច្បាប់អាជ្ញាសឹករបស់លោករយៈពេល៦ម៉ោងកាលពីខែមុន។

លោក Yoon ត្រូវបានបញ្ជូនទៅមន្ទីរឃុំឃាំងក្បែររដ្ឋធានីសេអ៊ូល បន្ទាប់ពីការសាកសួរជាង១០ម៉ោងកាលពីថ្ងៃពុធសប្ដាហ៍នេះដែរនៅទីស្នាក់ការកណ្តាលនៃការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ ក្នុងអំឡុងលោកបានប្រើសិទ្ធិរបស់លោកក្នុងការរក្សាភាពស្ងៀមស្ងាត់។

លោកYoon បានបដិសេធការសាកសួរបន្ថែមដោយក្រុមមន្ត្រីប្រឆាំងអំពើពុករលួយកាលពីថ្ងៃព្រហស្បតិ៍ ខណៈក្រុមមេធាវីរបស់លោកបានអះអាងថា ការស៊ើបអង្កេតនេះគឺខុសច្បាប់។

ក្រុមមេធាវីបានស្នើឱ្យតុលាការក្រុងសេអ៊ូលពិចារណាការដោះលែងលោកYoon ដោយចោទសួរពីសុពលភាពនៃដីកាឃុំខ្លួនសម្រាប់លោកប្រធានាធិបតីរូបនេះ ដែលចេញដោយតុលាការស្រុកសេអ៊ូលខាងលិច។ប៉ុន្តែតុលាការកណ្តាលស្រុកបានបដិសេធញត្តិរបស់ពួកគេកាលពីល្ងាចថ្ងៃព្រហស្បតិ៍សប្ដាហ៍នេះ។

លោក Yoon បានគេចវេះសំណើជាច្រើនលើកក្នុងការបង្ហាញខ្លួនសម្រាប់ការសាកសួរនៅចំពោះមុខភ្នាក់ងារប្រឆាំងអំពើពុករលួយ ហើយនគរបាល បានអនុវត្តប្រតិបត្តិការអនុវត្តច្បាប់ដ៏ធំមួយដែលបានប្រើកម្លាំងបុគ្គលិករាប់រយនាក់ដើម្បីឃុំខ្លួនរូបលោកនៅឯបរិវេណលំនៅដ្ឋានរបស់លោកក្នុងទីក្រុងសេអ៊ូល៕