រដ្ឋបាលប្រធានាធិបតីអាមេរិកបន្ទាប់របស់លោក Donald Trump គ្រោងនឹងអនុវត្តច្បាប់អន្តោប្រវេសន៍ទូទាំងប្រទេស ភ្លាមៗមួយរំពេច បន្ទាប់ពីលោកចូលកាន់តំណែង នៅថ្ងៃទី២០ ខែមករា។ នេះបើតាមបុគ្គលដែលដឹងអំពីផែនការនេះ បាននិយាយ។

កាលពីថ្ងៃសុក្រ (ទី១៧ ខែមករា) បុគ្គលនោះបានប្រាប់សារព័ត៌មាន Reuters ថា៖ «យើងនឹងធ្វើប្រតិបត្តិការ នៅទូទាំងប្រទេស។ អ្នកនឹងឃើញការចាប់ខ្លួន នៅទីក្រុងញូវយ៉ក។ អ្នកនឹងឃើញការចាប់ខ្លួន នៅទីក្រុង Miami»។

ប្រភពនេះបានឆ្លើយតបទៅនឹងរបាយការណ៍របស់សារព័ត៌មាន Wall Street Journal ដែលថា រដ្ឋបាលគ្រោងចាប់ផ្តើមបើកការវាយឆ្មក់អន្តោប្រវេសន៍ដ៏ធំមួយ នៅទីក្រុង Chicago កាលពីថ្ងៃទី១៤ ខែមករា។ ដោយដកស្រង់សម្ដីពីមនុស្ស ៤នាក់ដែលដឹងពីផែនការនេះ សារព័ត៌មាននោះ បានចុះផ្សាយថា ប្រតិបត្តិការ នៅទីក្រុង Chicago នឹងមានរយៈពេលពេញមួយសប្តាហ៍ ដោយស្ថាប័នអនុវត្តច្បាប់អន្តោប្រវេសន៍ និងគយរបស់សហរដ្ឋអាមេរិក បានបញ្ជូនមន្ត្រីពី ១០០ ទៅ ២០០នាក់ ដើម្បីអនុវត្តប្រតិបត្តិការនេះ។

តែប្រភពដែលបាននិយាយជាមួយសារព័ត៌មាន Reuters បានបដិសេធថា មិនមានកិច្ចខិតខំប្រឹងប្រែងពិសេស ក្នុងការបញ្ចូនបុគ្គលិកទៅទីក្រុង Chicago នោះឡើយ។ ក្រុមអន្តរកាលរបស់លោក Trump មិនបានឆ្លើយតបភ្លាមៗនោះទេ ចំពោះសំណើរបស់សារព័ត៌មាន Reuters ដើម្បីសុំការធ្វើអត្ថាធិប្បាយ។ បញ្ហាអន្តោប្រវេសន៍ គឺជាចំណុចដ៏សំខាន់នៃយុទ្ធនាការរបស់លោក Trump ក្នុងការបោះឆ្នោតប្រធានាធិបតីថ្ងៃទី៥ ខែវិច្ឆិកា។

លោក Trump បាននិយាយកាលពីខែមករា ឆ្នាំ២០២៤ ថា៖ «ក្នុងរង្វង់ពេលវេលានៃពិធីស្បថចូលកាន់តំណែងរបស់ខ្ញុំ យើងនឹងចាប់ផ្តើមប្រតិបត្តិការនិរទេសក្នុងស្រុកដ៏ធំបំផុត នៅក្នុងប្រវត្តិសាស្ត្រអាមេរិក»៕