ភ្នំពេញ៖ ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានពន្លឿនផ្តល់វ៉ាក់សាំងការពារជំងឺកូវីដ-១៩ ដូសទី៣ ឬដូសជំរុញ ជូនបងប្អូនប្រជាពលរដ្ឋ ចំនួន៤ទីតាំង គឺនៅមនី្ទរពេទ្យបង្អែកព្រែកព្នៅ, មណ្ឌលសុខភាព សំរោង, មណ្ឌលសុខភាព ពញាពន់ និងមណ្ឌលសុខភាព គោករកា ស្ថិតក្នុងខណ្ឌព្រែកព្នៅ។
ឯកឧត្តម លេង ផាលី ប្រធានប្រតិបតិ្តក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី តំណាងឯកឧត្តម ហ៊ុន ម៉ានី ប្រធានកិត្តិយសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានឲ្យដឹងកាលពីថ្ងៃទី៧ ខែវិច្ឆិកា ឆ្នាំ២០២១ ថា តបតាមការឧទ្ទេសនាមរបស់គណៈកម្មាការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស និងតាមយុទ្ធសាស្ត្រ《ផ្ការីក》ដែលជាចក្ខុវិស័យដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន កម្លាំងជំនាញក្រុមការងារគ្រូពេទ្យស្ម័គ្រចិត្ត ចាប់តាំងពីខែមេសា រហូតមកដល់ខែវិចិ្ឆកា ឆ្នាំ២០២១នេះ យើងបានចូលរួមក្នុងយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋបានចំនួន ៧រាជធានី-ខេត្ត ដោយចាប់ផ្តើមដំបូងនៅក្នុងខេត្តកោះកុង ខេត្តព្រះសីហនុ ខេត្តពោធិ៍សាត់ រាជធានីភ្នំពេញ ខេត្តកណ្តាល ខេត្តឧត្តរមានជ័យ និងខេត្តស្វាយរៀង។
ក្នុងនោះ យើងមានក្រុមគ្រូពេទ្យចំនួន១២៥៨នាក់ ប៉ុន្តែក្នុងយុទ្ធនាការចាក់វ៉ាក់សាំងនេះ យើងទើបតែប្រើកម្លាំងក្រុមគ្រូពេទ្យ អស់ចំនួន១០២២នាក់ប៉ុណ្ណោះ រហូតមកដល់សព្វថ្ងៃនេះ។ ដូច្នេះនៅសល់កម្លាំងក្រុមគ្រូពេទ្យជាង២០០នាក់ទៀត ដើម្បីត្រៀមចូលរួមយុទ្ធនាការចាក់វ៉ាក់សាំងកូវីដ១៩ ជូនប្រជាពលរដ្ឋក្នុងក្របខណ្ឌទូទាំងប្រទេស។
ជាមួយគ្នានោះដែរ យុវជន និងប្រជាពលរដ្ឋចាស់ជរា បានមកទទួលការចាក់វ៉ាក់សាំង ដូសទី៣ ឬដូសជំរុញ ពីក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចំនួន៤ទីតាំង ក្នុងមូលដ្ឋានខណ្ឌព្រែកព្នៅ បានបង្ហាញចំណាប់អារម្មណ៍របស់ខ្លួនថា ការចាក់វ៉ាក់សាំងដូសជម្រុញនេះ ពិតជាមានសារៈសំខាន់ណាស់នឹងបានធ្វើឲ្យសុខភាពរបស់ពួកគាត់ល្អ និងជារនាំងការពារមេរោគកូវីដ-១៩បានរឹងមាំល្អផងដែរ។ ដូច្នេះពួកគាត់សូមគោរពដឹងគុណ ថ្លែងអរគុណដល់ប្រមុខរាជរដ្ឋាភិបាលកម្ពុជា ជាពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា បានខិតខំស្វះស្វែងរកវ៉ាក់សាំងការពារជំងឺកូវីដ-១៩ មកចាក់ជូនពួកគាត់ ក៏ដូចជាបងប្អូនប្រជាពលរដ្ឋទូទាំងប្រទេស។
ជាមួយគ្នានោះដែរលោកបណ្ឌិត អ៊ី លីម៉ា ប្រធានលេខាធិការដ្ឋាន នៃក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី និងជាអ្នកស្រាវជ្រាវ បានលើកឡើងផងដែរថា ការចាក់វ៉ាក់សាំងការពារជំងឺកូវីដ-១៩នេះ ពិតជាមានប្រសិទ្ធភាពខ្លាំងណាស់។ ទី១.វ៉ាក់សាំងរបស់យើងសុទ្ធតែមានការទទួលស្គាល់ពីអង្គការសុខភាពពិភពលោក ដែលមានសម្តេចតេជោ ហ៊ុន សែន និងឯកឧត្តម ហ៊ុន ម៉ានី ប្រធានកិតិ្តយសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានស្វះស្វែងខ្នះខ្នែងរក និងដើម្បីឲ្យប្រជាជនទទួលបានការចាក់វ៉ាក់សាំងកូវីដ១៩ គឺទទួលដោយមិនអស់ថវិកា។
ជាចុងក្រោយក្នុងនាមលោកជាប្រធានលេខាធិការដ្ឋាន នៃក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ក៏សូមអំពាវនាវដល់បងប្អូនប្រជាពលរដ្ឋទាំងអស់ ដែលមានវត្តមាននៅក្នុងប្រទេសកម្ពុជា សូមអញ្ជើញមកទទួលការចាក់វ៉ាក់សាំងបង្ការជំងឺកូវីដ-១៩ ដូសទី៣ ឬដូសជំរុញ។ កត្តាវ៉ាក់សាំងកូវីដ-១៩នេះហើយ ដែលរាជរដ្ឋាភិបាលកម្ពុជា បានបើកដំណើរការប្រទេសឡើងវិញ៕ អត្ថបទ៖ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
