ក្រុមអ្នកពន្លត់អគ្គិភ័យ ដែលអស់កម្លាំង នៅទីក្រុង Los Angeles របស់អាមេរិក កាលពីថ្ងៃអាទិត្យ (១៩ មករា) បានបន្តទប់ទល់នឹងការវិលត្រឡប់មកវិញនៃខ្យល់ដ៏គ្រោះថ្នាក់បន្ថែមទៀត ខណៈចំហេះព្រៃដ៏សន្ធោសន្ធៅមិនទាន់រលត់ ហើយអភិបាលរដ្ឋកាលីហ្វ័រនីញ៉ា បានរិះគន់ "រលកនៃព័ត៌មានមិនពិត" ជុំវិញគ្រោះធម្មជាតិ ដែលបានសម្លាប់មនុស្សរាប់សិបនាក់ និងបាត់ខ្លួនជាច្រើន។

ក្រុមមន្ត្រីបានប្រកាសថា ចំហេះដ៏ធំបំផុតចំនួនពីរកន្លែង ដែលបានបំផ្លាញផ្ទៃដីជិត ១៦.០០០ហិកតា និងបានឆាបឆេះតំបន់ទាំងមូលនៃទីក្រុងដ៏ធំបំផុតទីពីររបស់សហរដ្ឋអាមេរិកនោះ ពេលនេះគ្រប់គ្រងបានជាងពាក់កណ្តាលហើយ។

ប៉ុន្តែសេវាអាកាសធាតុជាតិបានព្រមានថា ខ្យល់បក់ខ្លាំង និងសំណើមទាប នឹងនាំមកនូវ "លក្ខខណ្ឌអាកាសធាតុអំណោយផលសម្រាប់ចំហេះដ៏គ្រោះថ្នាក់" ចាប់ពីថ្ងៃចន្ទ ២០ ខែមករា នេះ ជាមួយនឹងខ្យល់ខ្លាំងរហូតដល់ ១៣០ គីឡូម៉ែត្រក្នុងមួយម៉ោង។

នៅពេលដែលទីក្រុង Los Angeles កំពុងសិក្សាពីទំហំពិតប្រាកដនៃការបំផ្លិចបំផ្លាញនេះ ការឈ្លោះប្រកែកគ្នាផ្នែកនយោបាយ ជាពិសេសរលកព័ត៌មានមិនពិតបានឡើងកម្ដៅកាន់តែខ្លាំង។ លោក Donald Trump ដែលស្បថចូលកាន់តំណែងជាប្រធានាធិបតីសហរដ្ឋអាមេរិកនៅថ្ងៃទី២០ ខែមករានេះ បានរិះគន់ខ្លាំងៗជាច្រើនដងលើក្រុមមន្ត្រីរដ្ឋកាលីហ្វ័រនីញ៉ា ជុំវិញមហន្តរាយនេះ៕