កងពលប្រដាប់អាវុធហាម៉ាស់ និយាយនៅក្នុងសុន្ទរកថាចាក់ផ្សាយលើកញ្ចក់ទូរទស្សន៍កាលពីថ្ងៃអាទិត្យថា ពួកគេនឹងគោរពតាមកិច្ចព្រមព្រៀងបទឈប់បាញ់ដែលបានចូលជាធរមានកនៅតំបន់ហ្កាហ្សា ប៉ុន្តែរាល់លទ្ធភាពណាមួយនៃការបំពានរបស់អ៊ីស្រាអែល នឹងធ្វើឲ្យគ្រោះថ្នាក់ដល់ដំណើរការបទឈប់បាញ់ និងធ្វើឲ្យជីវិតចំណាប់ថ្នូរស្ថិតក្នុងហានិភ័យ ។

លោក Abu Ubaida គឺជាអ្នកនាំពាក្យរបស់កងពលតូច Al-Qassam បានជំរុញក្រុមអ្នកសម្របសម្រួលបង្ខំឲ្យអ៊ីស្រាអែលប្តេជ្ញាចិត្តចំពោះកិច្ចព្រមព្រៀងបទឈប់បាញ់ ហើយក្រុមរបស់លោកនឹងគោរពតាមរាល់ដំណាក់កាលទាំងអស់នៃកិច្ចព្រមព្រៀង និងកាលបរិច្ឆេតនៃការដោះដូរអ្នកទោស និងចំណាប់ថ្នូរ ។

លោក Ubaida ថា កិច្ចព្រមព្រៀងដើម្បីបញ្ឈប់ការឈ្លានពានរបស់អ៊ីស្រាអែល និងសង្រ្គាមសម្លាប់រង្គាលលើពលរដ្ឋរបស់ពួកយើង បានក្លាយជាគោលដៅរបស់ពួកយើងអស់រយៈពេលជាច្រើនខែមកហើយ បើទោះបីជាតាំងពីការចាប់ផ្តើមការឈ្លានពាននេះក៏ដោយ ។

លោកបន្តថា កិច្ចព្រមព្រៀងដែលបានឈានដល់នេះ គួរតែសម្រេចបានតាំងពីរយៈពេល ១ឆ្នាំមុនមកម្ល៉េះ បើសិនជាវាស័ក្តិសមនឹងមហិច្ឆិតាចង់បានរបស់លោក Benjamin Netanyahu និងរដ្ឋាភិបាលរបស់លោក ។ 

នៅពេលមុននេះ ក្រុមហាម៉ាស់ បានដោះលែងចំណាប់ថ្នូរស្រ្តីអ៊ីស្រាអែល ៣នាក់ ដែលជាផ្នែកមួយនៃដំណាក់កាលដំបូងក្នុងកិច្ចព្រមព្រៀងបទឈប់បាញ់ ហើយអ៊ីស្រាអែល ត្រូវបានគេរំពឹងថា នឹងដោះលែងអ្នកទោសប៉ាឡេស្ទីនចំនួន៩០នាក់ផងដែរ ៕