អ្នកតាំងលំនៅឋានអ៊ីស្រាអែលរាប់សិបនាក់ បានវាយឆ្មក់លើភូមិប៉ាឡេស្ទីនជាច្រើន នៅតំបន់វេសបែង    ( West Bank) កាលពីយប់ថ្ងៃចន្ទ ដោយវាយប្រហារអ្នកស្រុក ដុតបំផ្លាញទ្រព្យសម្បត្តិ និងបង្កឲ្យមានការប៉ះទង្គិចគ្នា ជាមួយប្រជាជនប៉ាឡេស្ទីនក្នុងតំបន់។ នេះបើយោងតាមប្រភពពីអ៊ីស្រាអែល។

យោងតាមប្រភពរបស់អ៊ីស្រាអែល អ្នកតាំងលំនៅប្រហែល ៥០នាក់ បានដុតបំផ្លាញអគារ និងរថយន្ត នៅក្នុងភូមិ Al Funduq និង Jinsafut ភាគខាងកើតទីក្រុងQalqilyaនៃតំបន់វេសបែង ខណៈពេលដែលកំពុងគប់ដុំថ្មទៅលើប្រជាជនប៉ាឡេស្ទីនផងដែរ។ រូបភាពវីដេអូដែលត្រូវបានគេចែកចាយ នៅលើ             បណ្តាញសង្គម បានបង្ហាញឲ្យឃើញភ្លើងកំពុងឆេះ នៅក្នុងភូមិមួយនិងសំឡេងកាំភ្លើង នៅទីនោះ។

សេវាជួយសង្គ្រោះ Magen David Adom របស់អ៊ីស្រាអែល បានរាយការណ៍ថា ជនជាតិអ៊ីស្រាអែលពីរនាក់ បានរងរបួស ដោយសារការបាញ់ប្រហារដោយកាំភ្លើង ដោយម្នាក់ក្នុងស្ថិតក្នុងស្ថានភាពធ្ងន់        ធ្ងរ។    ភ្លាមៗនោះ គេមិនទាន់ដឹងច្បាស់ថា មកពីមូលហេតុអ្វីបានបណ្តាលឲ្យមានការបាញ់ប្រហារនេះកើតឡើងទេ ប៉ុន្តែទូរទស្សន៍ Kan TV ដែលគ្រប់គ្រងដោយរដ្ឋរបស់អ៊ីស្រាអែល បានអះអាងថា អ្នកតាំងលំនៅទាំងពីរ ទំនងជាត្រូវបានបាញ់ដោយមន្ត្រីនគរបាលអ៊ីស្រាអែល ដែលបានធ្វើខុស អំឡុងពេលមាន  ចលាចល។ ហេតុការណ៍នេះ កំពុងស្ថិតក្រោមការស៊ើបអង្កេតនៅឡើយ។

ភ្លាមៗនោះ គេមិនដឹថា មានអ្នកស្លាប់និងរបួស នៅក្នុងចំណោមប្រជាជនប៉ាឡេស្ទីនឬយ៉ាងណាទេ។

យោធាអ៊ីស្រាអែល បានចេញសេចក្តីថ្លែងការណ៍មួយ ដែលបានលើកឡើងថា កងកម្លាំងយោធា និងនគរបាលព្រំដែន ត្រូវបានបញ្ជូនទៅកាន់តំបន់នោះ បន្ទាប់ពីទទួលបានសេចក្តីរាយការណ៍អំពីកុបកម្ម។