​បាល់ទាត់៖ ​ការដឹកនាំ​របស់ Ole Gunnar Solskjaer នៅ​ក្រុម​បិសាច​ក្រហម Manchester United កាន់តែ​រង​សំពាធ​ខ្លាំងបន្ទាប់​លទ្ធផល​ដែល​ទទួលបាន​កាន់តែ​យ៉ាប់​ទៅៗ​។ ​បរាជ័យ ២-០ ក្រោម​ថ្វីដៃ​ក្រុម​ក្បែ​រខាង Manchester City បានបង្ហាញ​ពី​រូបភាព​ដ៏​អាក្រក់​មួយ​នៃ​ទំរង់​លេង​ ដែលមាន​ក្រុម​តែ​ម្ខាង​គ្របដណ្តប់​ស្ទើ​រតែ​ទាំងស្រុង​។

​​Manchester City បាន​បំបែក​កំណត់ត្រា​បញ្ជូន​បាល់​បាន​ច្រើន​បំផុត​ក្នុង​ ១​ប្រកួត​ដែល​សរុប​ដល់​ទៅ ៧៥៣បាល់​បញ្ជូន​ក្នុង​រយៈពេល ៩០នាទី​ជាមួយ​ស្ថិតិ​គ្រប់គ្រង​បាល់​ដល់​ទៅ ៦៧%​។​ ​ក្រុម​របស់​លោក Pep Guardiola មានឱកាស​ស៊ុត​ដល់​ទៅ ១៦លើក ៥​លើក​ចំ​គោល​ដៅ​ ខណៈ Manchester United មានឱកាស​តែ ៥​លើក​ស៊ុត​ចំ​គោលដៅ​តែ ១​លើក​គត់​។ ​​បន្ទាប់ពី​បរាជ័យ ៥-០ ក្រោម​ថ្វី​ជើង Liverpool និង ២-០ ចាញ់ Manchester City លើក​នេះ​បានបង្ហាញ​ច្បាស់​ថា ​គុណភាព​របស់ Manchester United នៅពេល​ជួប​ក្រុម​ខ្លាំង​ត្រូវបាន​គេ​មើលឃើញ​យ៉ាងច្បាស់​ថា ​ក្រុម​របស់លោក Ole Gunnar Solskjaer មិនមែនជា​ដៃគូ ហើយ​អ្នកគាំទ្រ​គ្រប់គ្នា​ក៏​យល់ច្បាស់​ដែរ​ថា ​ជា​ពេលវេលា​ដែល​ត្រូវ​ផ្លាស់ប្តូរ​។​ ​​នៅពេលនេះ​កីឡាករ​កំពូល​របស់​ក្លិប​ទាំងពីរ​នាក់​រួមមាន Bruno Fernandes និង Cristiano Ronaldo បាន​បញ្ចេញ​អារម្មណ៍​បាត់បង់​ទំនុកចិត្ត​លើការដឹកនាំ​បច្ចុប្បន្ន​របស់​ក្រុម នេះ​បើតាម​ការចុះផ្សាយ​របស់​សារព័ត៌មាន Daily Mail​។​

​​Bruno Fernandes ជា​កីឡាករ​ម្នាក់​ដែលមាន​អារម្មណ៍​ហាក់​មិន​ទទួលបាន​ ការធ្វើការ​ផ្ទាល់​ជិតស្និត​ជាមួយ​អ្នកចាត់ការ​បច្ចុប្បន្ន​លោក Solskjaer ខណៈ Cristiano Ronaldo បានបង្ហាញ​អារម្មណ៍​ភ្ញាក់ផ្អើល​នៅពេល​ឃើញ​ការធ្លាក់ចុះ នៃ​ស្តង់ដារ​របស់​ក្លិប​បើ​ប្រៀបធៀប​នឹង​កាល​កាលពី ១២ឆ្នាំមុន​ដែល​គេ​បាន​ចាកចេញ​។ ​​Manchester United បាន​ធ្លាក់​ទៅដល់​លេខ ៦ ក្នុង​តារាង​ក្រោយ​លេង​បាន ១១ប្រកួត​ឈ្នះ ៥ប្រកួត​ប៉ុណ្ណោះ​ក្រៅពីនោះ​មាន​ស្មើ២ ចាញ់៤ មាន​ត្រឹម ១៧ពិន្ទុ​តាម​ពីក្រោយ Chelsea ដែលជា​ក្រុម​នាំមុខ​ដល់​ទៅ ៩ពិន្ទុ​៕

​អត្ថបទ​៖​នាង សុភា​វុ​ធ