បទឈប់បាញ់ នៅតំបន់ហ្កាហ្សា បានឈានចូលដល់ថ្ងៃទី២ ហើយ ដោយរថយន្តជំនួយរាប់រយគ្រឿងអាចចូលដោយមិនមានការរារាំងទៅក្នុងដែនដីដែលត្រូវបានបំផ្លិចបំផ្លាញដោយសង្រ្គាម បន្ទាប់ពីមានការដោះដូរជាលើកដំបូង រវាងចំណាប់ថ្នូរ និងអ្នកទោស ។

ប៉ុន្តែអ្វីដែលនឹងកើតមាននាពេលបន្ទាប់ គឺមិនមានភាពច្បាស់លាស់ប្រាកដប្រជានោះឡើយ។ រដ្ឋបាលរបស់នាយករដ្ឋមន្ត្រីអ៊ីស្រាអែល លោក Benjamin Netanyahu បានរងគ្រោះដោយសារកិច្ចព្រមព្រៀងគាំទ្រដោយសហរដ្ឋអាមេរិក ដោយទី១ សមាជិកគណៈរដ្ឋមន្ត្រីស្តាំនិយមជ្រុល បានដកក្រុមរបស់ខ្លួនចេញពីរដ្ឋាភិបាលចម្រុះដែលកំពុងកាន់អំណាច ដើម្បីជាការតវ៉ា។ ទី២ រដ្ឋមន្ត្រីក្រសួងហិរញ្ញវត្ថុ លោក Bezalel Smotrich បានប្តេជ្ញាថា នឹងធ្វើដូច្នេះដែរ ប្រសិនបើសង្រ្គាមរយៈពេល ១៥ខែ ប្រឆាំងនឹងក្រុមហាម៉ាសដែលគាំទ្រដោយអ៊ីរ៉ង់ មិនចាប់ផ្តើមឡើងវិញក្នុងរយៈពេល ៦សប្តាហ៍នោះទេ។ ការធ្វើបែបនោះអាចធ្វើឲ្យរដ្ឋាភិបាលមានសំឡេងភាគតិច។

នៅតំបន់ហ្កាហ្សាឯណេះវិញ សំណួរថា តើអ្នកណាដែលនឹងគ្រប់គ្រងដែនដីមានប្រជាជន ២,២លាននាក់ និងដែលត្រូវត្រួតពិនិត្យកិច្ចប្រឹងប្រែងកសាងឡើងវិញនោះ មិនត្រូវបានដោះស្រាយនោះ។ ក្រុមសកម្មប្រយុទ្ធហាម៉ាស ដែលមានពាក់ស្រោមមុខ និងប្រដាប់ដោយអាវុធ បាននាំគ្នាចេញមកពេញដងផ្លូវ បន្ទាប់ពីបទឈប់បាញ់ត្រូវបានអះអាង ដើម្បីបង្ហាញថា ពួកគេមិនបរាជ័យឡើយ។

ទន្ទឹមនឹងនេះ អាជ្ញាធរប៉ាឡេស្ទីន (PA) ដែលគ្រប់គ្រងផ្នែកនៃតំបន់ West Bank ប៉ុន្តែត្រូវបានរុញចេញជាផ្លូវការពីតំបន់ហ្កាហ្សាដោយក្រុមហាម៉ាស ក្នុងឆ្នាំ២០០៧ លើកឡើងថា ខ្លួនជាអ្នកទទួលខុសត្រូវ ដោយបានចេញវីដេអូបង្ហាញពីក្រុមដែលធ្វើប្រតិបត្តិការឈូសឆាយ និងណែនាំធនាគារឲ្យដំណើរការសេវាកម្មឡើងវិញ។

តែយ៉ាងណាក្ដី អ៊ីស្រាអែល បានប្រាប់ថា ទាំងក្រុមហាម៉ាស និង PA នឹងមិនត្រូវបានអនុញ្ញាតឲ្យគ្រប់គ្រងតំបន់ហ្កាហ្សានោះឡើយ បើទោះជាខ្លួនមិនបាននិយាយថា នរណានឹងជាអ្នកគ្រប់គ្រងក៏ដោយ៕