ក្មេងៗត្រូវបានគេមើលឃើញជញ្ជូនរបស់របររបស់ពួកគេដើរឆ្លងកាត់ផ្លូវធូលីនៅទីក្រុងហ្កាហ្ស ពេលដែលបទឈប់បាញ់តំបន់ហ្កាហ្សាចូលជាធរមាន ។

នៅតំបន់ភាគខាងជើងដែនដីបិទច្រកមួយនេះ ជាទីដែលតំបន់មួយចំនួនធ្លាប់រងការវាយប្រហារខ្លាំងក្លាបំផុតពីការវាយប្រហារតាមច្រកអាកាសរបស់អ៊ីស្រាអែល និងសង្រ្គាមជាមួយក្រុមហាម៉ាស់កើតឡើងនោះ ពលរដ្ឋត្រូវបានគេមើលឃើញដើរឆ្លងកាត់ផ្លូវធូលី ពោពេញដោយបេតុងបាក់បែក និងចម្រឹងដែក ។

ដោយសារលទ្ធផលនៃជម្លោះស្លាប់មនុស្ស ឬរងរបួសដ៏ច្រើនសន្ធឹកសន្ធាប់នេះ ក្មេងៗនៅក្នុងគ្រួសារជាច្រើន ត្រូវទួលរែកបន្ទុកកាន់តែធ្ងន់ជាងមុន ។

សូមបញ្ជាក់ថា កិច្ចព្រមព្រៀងបទឈប់បាញ់ដែលបានចូលជាធរមាន ក្រោយពន្យាពេលជិត ៣ម៉ោងនេះ នឹងផ្អាកសង្រ្គាមដែលនាំឲ្យមានការផ្លាស់ប្តូរនយោបាយដ៏រង្គោះរង្គើរនៅក្នុងតំបន់មជ្ឈិមបូព៌ា ហើយនិងផ្តល់ក្តីសង្ឃឹមដល់ពលរដ្ឋ ២,៣លាននាក់នៅក្នុងតំបន់ហ្កាហ្សា ដែលភាគច្រើននៃពួកគេ បានជម្លៀសខ្លួនជាច្រើនលើកច្រើនសារ ។

យោងតាមការអះអាងរបស់ក្រុមមន្រ្តីសុខភាពនៅតំបន់ហ្កាហ្សា បានឲ្យដឹងថា ជនប៉ាឡេស្ទីនជាង ៤៧.០០០នាក់ ត្រូវបានសម្លាប់ ចាប់តាំងពីការវាយប្រហាររបស់អ៊ីស្រាអែល ហើយពលរដ្ឋស្ទើតែទាំងស្រុង ២,៣លាននាក់នៅតំបន់ហ្កាហ្សា គ្មានផ្ទះសម្បែងរស់នៅ ។ ចំណែកឯទាហានអ៊ីស្រាអែលប្រហែល ៤០០នាក់ បានស្លាប់ផងដែរ ។

បទឈប់បាញ់នេះ បានអំពាវនាវឲ្យបញ្ឈប់សង្រ្គាម ជំនួយត្រូវតែបញ្ជូនចូលទៅក្នុងតំបន់ហ្កាហ្សា ហើយចំណាប់ថ្នូរ ៣៣នាក់ ក្នុងចំណោមចំណាប់ថ្នូរជិត ១០០នាក់ ត្រូវតែដោះលែងឲ្យមានសេរីភាពក្នុងដំណាក់កាលដំបូងមានរយៈពេល ៦សប្តាហ៍ ជាការដោះដូរនឹងអ្នកទោសប៉ាឡេស្ទីនជិត ២ពាន់នាក់ ដែលឃុំខ្លួននៅក្នុងពន្ធនាគារអ៊ីស្រាអែល ៕