ដោយធ្វើដំណើរតាមថ្មើរជើង ឬជិះរ៉ឺម៉ក ប្រជាជនប៉ាឡេស្ទីនជាច្រើននាក់ដែលហត់នឿយដោយសង្រ្គាមនៅតំបន់ហ្កាហ្សា បានបន្តត្រឡប់ទៅផ្ទះសម្បែងរបស់ពួកគេវិញនៅថ្ងៃទីបីនៃបទឈប់បាញ់រវាងអ៊ីស្រាអែល និងក្រុមហាម៉ាស ប៉ុន្តែភាពរីករាយនោះបានរលាយបាត់ទៅវិញ នៅពេលមើលឃើញការបំផ្លិចបំផ្លាញដ៏ធំក្នុងតំបន់ហ៊ុមព័ទ្ធ។

អ្នកស្រុកហ្កាហ្សាខ្លះមិនអាចសូម្បីតែមើលស្គាល់កន្លែងដែលពួកគេធ្លាប់រស់នៅ ហើយចាកចេញពីតំបន់ដ៏ខ្ទេចខ្ទីនោះរួចត្រឡប់រកទៅតង់ដែលពួកគេស្នាក់នៅអស់ពេលជាច្រើនខែកន្លងមក។ អ្នកខ្លះទៀតបានចាប់ផ្ដើមបោសសម្អាតកម្ទេចកម្ទីដើម្បីព្យាយាមរើត្រឡប់ទៅផ្ទះសម្បែងដែលខូចខាតវិញ។

មនុស្សជាច្រើនសង់តង់នៅជាប់លំនៅឋានដែលបាក់បែករបស់ខ្លួន ឬរើទៅនៅក្នុងផ្ទះបែកបាក់នោះវិញ ដោយក្នុងចិត្តមានសំណួរថា តើការសាងសង់ឡើងវិញនឹងចាប់ផ្ដើមនៅពេលណា។ ការវាយតម្លៃការខូចខាតរបស់អង្គការសហប្រជាជាតិ ដែលចេញផ្សាយក្នុងខែនេះ បានបង្ហាញថា ការបោសសម្អាតកម្ទេចកម្ទីជាង ៥០លានតោន ពីការទម្លាក់គ្រាប់បែករបស់អ៊ីស្រាអែល អាចចំណាយពេល ២១ឆ្នាំ និងចំណាយប្រាក់រហូតដល់ ១,២ពាន់លានដុល្លារ។

ជាមួយគ្នានេះ ក្រុមសង្គ្រោះប៉ាឡេស្ទីនបានបន្តការស្វែងរកសាកសពរបស់អ្នកស្រុកដែលកប់នៅក្រោមគំនរបាក់បែក និងនៅតាមដងផ្លូវ ដោយរកឃើញសាកសពយ៉ាងហោចណាស់ ១៥០នាក់ ចាប់តាំងពីបទឈប់បាញ់ចូលជាធរមាន។ សេវាសង្គ្រោះបន្ទាន់ស៊ីវិលប៉ាន់ស្មានថា សាកសពប្រមាណ ១០.០០០នាក់ នៅតែស្ថិតនៅក្រោមគំនរបាក់បែក៕