ប្រធានាធិបតីសហរដ្ឋអាមេរិកលោក Donald Trump បាននិយាយកាលពីថ្ងៃអង្គារ ២១ មករាសប្ដាហ៍នេះ ថា លោកនឹងបើកចំហចំពោះមហាសេដ្ឋីបច្ចេកវិទ្យាលោក Elon Musk ដែលជាម្ចាស់វេទិកាប្រព័ន្ធផ្សព្វផ្សាយសង្គម X ទិញយកកម្មវិធី TikTokដ៏ល្បីល្បាញរបស់ចិន។

លោក Trump បានប្រាប់អ្នកសារព័ត៌មាននៅពេលសួរថាតើលោកបើកចំហចំពោះលោក Musk ដែលជាមហាសេដ្ឋីមានទ្រព្យច្រើនបំផុតរបស់ពិភពលោក និងជាមេគំនិតផ្តួចផ្តើមកាត់បន្ថយថវិកាក្នុងរដ្ឋបាលថ្មីក្នុងការទិញបណ្ដាញនេះដែរទេ ថាខ្ញុំនឹងបើកផ្លូវ ប្រសិនបើលោក Musk ចង់ទិញបណ្ដាញសង្គមកម្សាន្តមួយនេះ ។

អេបកម្សាន្តសម្រាប់បង្ហោះវីដេអូខ្លី TikTok កំពុងប្រឈមការគាបសង្កត់ក្រោមច្បាប់របស់សហរដ្ឋអាមេរិក ដែលបានបញ្ជាឱ្យក្រុមហ៊ុននេះដកខ្លួនចេញពីក្រុមហ៊ុនមេ ByteDance របស់ប្រទេសចិន ពុំនោះត្រូវហាមប្រាមមិនឲ្យមានវត្តមាននៅលើទឹកដីរបស់សហរដ្ឋអាមេរិកទៀតឡើយ។

មួយក្នុងចំណោមសកម្មភាពជាច្រើនដំបូងរបស់លោកនៅក្នុងតំណែង លោក Trump បានបញ្ជាឱ្យផ្អាកលើការអនុវត្តច្បាប់ដែលគួរតែមើលឃើញ TikTok មានវត្តមាននៅក្នុងប្រទេសនេះតទៅទៀតកាលពីថ្ងៃអាទិត្យមួយថ្ងៃមុនពេលលោកស្បថចូលកាន់តំណែងសម្រាប់អាណត្តិទីពីរ។

ក្រឹត្យនេះ បានបញ្ជាឲ្យក្រសួងយុត្តិធម៌ពន្យារពេលការអនុវត្តច្បាប់នេះរយៈពេល ៧៥ថ្ងៃ មានន័យថាTik Tok អាចរក្សាវត្តមាននៅលើទឹកដីអាមេរិកសម្រាប់មនុស្ស១៧០លាននាក់ជាបណ្ដោះអាសន្ន។

ដើម្បីជួយសង្រ្គោះប្រតិបត្តិការនៅសហរដ្ឋអាមេរិករបស់ក្រុមហ៊ុន លោក Trump កាលពីថ្ងៃចន្ទក៏បានបង្កើបគំនិតនៃភាពជាដៃគូ៥០-៥០ រវាងសហរដ្ឋអាមេរិក និងម្ចាស់ក្រុមហ៊ុន ByteDance របស់ចិន ផងដែរ ទោះលោកពុំបានផ្តល់ព័ត៌មានលម្អិតថាតើត្រូវចាត់ចែងដោយរបៀបណាក៏ដោយ៕