ប្រធានាធិបតីអាមេរិក លោក Donald Trump បាននិយាយកាលពីថ្ងៃចន្ទ (២០ មករា) ថា លោកមិនមានទំនុកចិត្តថា បទឈប់បាញ់នៅតំបន់ហ្កាហ្សា នឹងអាចស្ថិតស្ថេរយ៉ាងរលូននោះទេ បើទោះជាបានអះអាងគុណសម្បត្តិសម្រាប់ការរកបានកិច្ចព្រមព្រៀងដ៏ផុយស្រួយរវាងអ៊ីស្រាអែល និងក្រុមហាម៉ាសក៏ដោយ។

នៅពេលត្រូវសាកសួរថាតើបទឈប់បាញ់នោះនឹងដំណើរការ ហើយបន្តរហូតដល់បីដំណាក់កាលដែលបានគ្រោងទុកឬទេ លោក Trump ឆ្លើយថា “យើងមិនមានទំនុកចិត្តទេ ព្រោះនេះមិនមែនជាសង្រ្គាមរបស់យើងឡើយ វាជាសង្រ្គាមរបស់ភាគីជម្លោះទាំងពីរ”។

ទុទិដ្ឋិនិយមរបស់ប្រធានាធិបតីអាមេរិករូបនេះគឺមិនប្លែកទេ ខណៈមានសម្ពាធយ៉ាងច្រើនឱ្យចាប់ផ្តើមសង្រ្គាមហ្កាហ្សាឡើងវិញពីអ្នកនយោបាយស្តាំនិយមជ្រុលរបស់អ៊ីស្រាអែល ដែលជឿថាបទឈប់បាញ់នេះគឺជាការបំភាន់របស់ក្រុមហាម៉ាសប៉ុណ្ណោះ។

លោក Itamar Ben-Gvir នៃគណបក្សអំណាចជ្វីហ្វ របស់អ៊ីស្រាអែលនៅសប្តាហ៍នេះ បានលាលែងពីតំណែងជារដ្ឋមន្ត្រីសន្តិសុខជាតិ ដោយកាត់បន្ថយសំឡេងភាគច្រើនក្នុងសភារបស់នាយករដ្ឋមន្ត្រី Benjamin Netanyahu ជុំវិញបទឈប់បាញ់ហ្កាហ្សា ខណៈរដ្ឋមន្ត្រីហិរញ្ញវត្ថុ លោក Bezalel Smotrich បានគំរាមធ្វើដូចគ្នា ប្រសិនបើលោក Netanyahu មិនបញ្ឈប់បទឈប់បាញ់ នៅពេលណាដែលដំណាក់កាលដំបូងរយៈពេល ៤២ថ្ងៃត្រូវបានបញ្ចប់ទេនោះ៕