ក្រុមឃ្លាំមើលសង្គ្រាម បាននិយាយថា មនុស្សចំនួន ៦នាក់ ត្រូវបានសម្លាប់កាលពីថ្ងៃអង្គារ នៅក្នុងខេត្ត Homs ភាគកណ្តាលរបស់ប្រទេសស៊ីរី ខណៈដែលកងកម្លាំងសន្តិសុខ បានបើកប្រតិបត្តិការបោសសម្អាត តំបន់នោះ។

ទីភ្នាក់ងារព័ត៌មានផ្លូវការ SANA បានរាយការណ៍ថា កងកម្លាំងសន្តិសុខ កំពុងប្រតិបត្តិការ នៅក្នុងតំបន់ជុំវិញភូមិ Ghour Al-Gharbiya ភាគខាងលិចទីក្រុង Homs «ប្រឆាំងនឹងកងជីវពលដែលនៅសេសសល់ដែលគាំទ្រ» ប្រធានាធិបតីដែលត្រូវបានបណ្តេញចេញ លោក បាសា អាល់អាសាដ (Bashar Assad)។  

សារព័ត៌មាន SANA បានអះអាងដោយដកស្រង់សម្តីប្រភពថា ប្រតិបត្តិការនេះ ក៏បានកំណត់គោលដៅអ្នកជួញដូរ និងអ្នករត់ពន្ធគ្រឿងញៀនផងដែរ។ កាសែតនេះ បានបន្ថែមថា ឃ្លាំងអាវុធ និងអាវុធដែលជាកម្មសិទ្ធិរបស់របបដែលត្រូវបានបណ្តេញចេញ» ត្រូវបានរកឃើញ ដោយបានរាយការណ៍ថា ការប៉ះទង្គិចគ្នាដោយហិង្សា បានផ្ទុះឡើង។

ក្រុមឃ្លាំមើលសិទ្ធិមនុស្សស៊ីរី បាននិយាយថា មនុស្ស ៦នាក់ ត្រូវបានសម្លាប់ នៅក្នុងភូមិដែលភាគច្រើនជាជនជាតិស៊ីអ៊ីតរស់នៅ ដែលស្ថិតនៅជិតព្រំដែនជាមួយប្រទេសលីបង់។

ក្រោយមក ក្រុមឃ្លាំមើល បានបញ្ជាក់ថា ក្នុងចំណោមអ្នកដែលត្រូវបានសម្លាប់ មានពីរនាក់ជា «បុគ្គលប្រដាប់អាវុធ» ដែលបានស្លាប់ក្នុងអំឡុងពេលប៉ះទង្គិចគ្នាជាមួយកងកម្លាំងសន្តិសុខ ខណៈដែល ៤នាក់ផ្សេងទៀតជា «ជនស៊ីវិលដែលត្រូវបានសម្លាប់ដោយខ្មាន់កាំភ្លើងក្នុងស្រុក ដែលបានចូលក្នុងទីក្រុងនេះ» រួមជាមួយនឹងកងកម្លាំងសន្តិសុខ។