ទីភ្នាក់ងារសារព័ត៌មាន Interfax បានរាយការណ៍ថា អនុរដ្ឋមន្ត្រីការបរទេសរុស្ស៊ី លោក Sergei Ryabkov នៅថ្ងៃពុធនេះ (ទី២២ ខែមករា) នេះ បាននិយាយថា ទីក្រុងមូស្គូមើលឃើញឱកាសតូចមួយ ក្នុងការបង្កើតកិច្ចព្រមព្រៀងជាមួយរដ្ឋបាលថ្មីរបស់ប្រធានាធិបតីសហរដ្ឋអាមេរិក លោក Donald Trump។

បើយោងតាមសារព័ត៌ាមាន Interfax បានឲ្យដឹងថា លោក Ryabkov បាននិយាយថា៖ «យើងមិនអាចនិយាយអ្វីបានទេ នាពេលនេះ អំពីកម្រិតនៃសមត្ថភាពរបស់រដ្ឋបាលថ្មី សម្រាប់ការចរចា ប៉ុន្តែបើប្រៀបធៀបទៅនឹងភាពអស់សង្ឃឹមនៃគ្រប់ទិដ្ឋភាពរបស់អ្នកគ្រងគ្រងសេតវិមានមុន (Joe Biden) នៅតែមានឱកាស នាពេលនេះ ទោះបីជាវាមើលទៅមានកម្រិតតូចក៏ដោយ»។

ដោយនិយាយនៅឯវិទ្យាស្ថាន សម្រាប់ការសិក្សាសហរដ្ឋអាមេរិក និងកាណាដា ដែលជាវិទ្យាស្ថានស្រាវជ្រាវនៅទីក្រុងមូស្គូ លោកបានបន្ថែមថា៖ «ដូច្នេះវាមានសារៈសំខាន់ណាស់ ក្នុងកាដឹងអំពីអ្វី និងអ្នកណាដែលយើងនឹងត្រូវដោះស្រាយជាមួយ អំពីរបៀបល្អបំផុតក្នុងការកសាងទំនាក់ទំនងជាមួយទីក្រុងវ៉ាស៊ីនតោន និងអំពីរបៀបល្អបំផុត ដើម្បីបង្កើនឱកាស និងកាត់បន្ថយហានិភ័យ»។

លោក Trump ដែលចូលកាន់តំណែងកាលពីថ្ងៃចន្ទ (ទី២០ ខែមករា) បាននិយាយថា លោកអាចបញ្ចប់សង្រ្គាមនៅអ៊ុយក្រែនបានយ៉ាងឆាប់រហ័ស ដោយមិនបានបញ្ជាក់ពីរបៀបដែលត្រូវធ្វើនោះឡើយ។ លោកបានព្រមានកាលពីថ្ងៃអង្គារថា លោកទំនងជានឹងដាក់ទណ្ឌកម្មបន្ថែមទៀតលើប្រទេសរុស្ស៊ី ប្រសិនបើប្រធានាធិបតី លោក Vladimir Putin មិនព្រមចរចា ដើម្បីបញ្ចប់ជម្លោះដែលអូសបន្លាយពេលជិត ៣ឆ្នាំទេនោះ៕