ក្រុមឧទ្ទាមម៉ៅនិយមយ៉ាងហោច ១៥នាក់ ត្រូវបានបាញ់សម្លាប់ដោយកងកម្លាំងសន្តិសុខនៅតាមព្រំប្រទល់រដ្ឋ Chhattisgarh និងរដ្ឋ Odisha ស្ថិតនៅតំបន់ភាគខាងកើតប្រទេសឥណ្ឌា នាថ្ងៃពុធនេះ ។

ប្រតិបត្តិការពាក់ព័ន្ធនឹងកងកម្លាំងសន្តិសុខមកពីរដ្ឋទាំង ២ បានចាប់ផ្តើមកាលពីថ្ងៃអាទិត្យ ដោយការពើបប្រទះ បានបន្តរហូតដល់ព្រឹកថ្ងៃអង្គារ ។

ប្រតិបត្តិការនេះដែរ បានសម្លាប់ឧទ្ទាមម៉ៅនិយមម្នាក់ដែលទទួលបានប្រាក់រង្វាន់ ១២១.០០០សម្រាប់ក្បាលរបស់គាត់ ។

រដ្ឋ Chhattisgarh និងរដ្ឋជិតខាងស្ថិតនៅភាគកណ្តាល និងភាគខាងកើតប្រទេសឥណ្ឌា រងផលប៉ះពាល់ដោយសារការបះបោរអស់រយៈជាច្រើនទសវត្សរ៍មកហើយ របស់ក្រុមឧទ្ទាមម៉ៅនិយម បើទោះបីជាតំបន់ដែលពួកគេប្រតិបត្តិការត្រូវបានកាត់បន្ថយច្រើនក្នុងរយៈពេលជាច្រើនឆ្នាំកន្លងមកនេះក៏ដោយ ។

ក្រុមឧទ្ទាមម៉ៅនិយម និយាយថា ពួកគេធ្វើសង្រ្គាមជាមួយរដ្ឋាភិបាលឥណ្ឌា ដើម្បីជួយឲ្យកសិករក្រីក្រ និងកម្មករគ្មានដីចម្ការទទួលបានការគ្រប់គ្រងដីរបស់ពួកគេកាន់តែច្រើនបន្ថែមទៀត ក៏ដូចជាដីសម្បូររ៉ែដែលបច្ចុប្បន្នត្រូវបានធ្វើអាជីវកម្មដោយក្រុមហ៊ុនជីករ៉ែធំៗជាច្រើន ៕