អាជ្ញាធរម៉ិកស៊ិក បានចាប់ផ្តើមសាងសង់ជម្រកតង់បណ្ដោះអាសន្នដ៏ធំនៅក្នុងទីក្រុង ស៊ីអ៊ូដាដ ហ័ររ៉េស (Ciudad Juarez) ដើម្បីត្រៀមទុកសម្រាប់លំហូរលនៃជនជាតិម៉ិកស៊ិក ដែលត្រូវបាននិរទេស ក្រោមការសន្យានៃការនិរទេសជនអន្តោប្រវេសន៍ដ៏ធំរបស់លោកប្រធានាធិបតីអាមេរិក Donald Trump។

មន្ត្រីសាលាក្រុង លោក អ៊ិនរីកេ លីខូន (Enrique Licon) បាននិយាយថា ជម្រកបណ្តោះអាសន្ននៅក្រុង Ciudad Juarez នេះនឹងមានសមត្ថភាពផ្ទុកមនុស្សរាប់ពាន់នាក់ ហើយគួរតែរួចរាល់ក្នុងរយៈពេលប៉ុន្មានថ្ងៃទៀតនេះ។ ជម្រកតង់នេះគឺជាផ្នែកមួយនៃផែនការរបស់រដ្ឋាភិបាលម៉ិកស៊ិក ក្នុងការត្រៀមរៀបចំកន្លែងស្នាក់នៅ និងមជ្ឈមណ្ឌលទទួលភ្ញៀវនៅក្នុងទីក្រុងចំនួន៩ នៅទូទាំងភាគខាងជើងម៉ិកស៊ិក។

អាជ្ញាធរនៅតំបន់នោះនឹងផ្តល់ឱ្យជនជាតិម៉ិកស៊ិកដែលត្រូវបាននិរទេសនូវអាហារ កន្លែងស្នាក់នៅបណ្តោះអាសន្ន ការថែទាំសុខភាព និងជំនួយក្នុងការទទួលបានឯកសារអត្តសញ្ញាណ នេះបើយោងតាមឯកសាររបស់រដ្ឋាភិបាល ដែលគូសបញ្ជាក់អំពីយុទ្ធសាស្ត្រហៅថា "ម៉ិកស៊ិកមើលថែអ្នក"។

រដ្ឋាភិបាលក៏គ្រោងដាក់រថយន្តក្រុងត្រៀមដឹកប្រជាជនម៉ិកស៊ិកពីមជ្ឈមណ្ឌលទទួលភ្ញៀវត្រឡប់ទៅស្រុកកំណើតពួកគេវិញផងដែរ។ លោក Trump បានប្តេជ្ញាអនុវត្តកិច្ចខិតខំប្រឹងប្រែងនិរទេសដ៏ធំបំផុតនៅក្នុងប្រវត្តិសាស្រ្តរបស់ប្រទេស ដែលនឹងដកជនអន្តោប្រវេសន៍រាប់លាននាក់ចេញពីសហរដ្ឋអាមេរិក៕