ប្រមុខកម្មវិធីអភិវឌ្ឍអង្គការសហប្រជាជាតិ ឬហៅថាអង្គការ UNDP លោក Achim Steiner បាននិយាយកាលពីថ្ងៃពុធ (២២ មករា) ថា ពលរដ្ឋដែនដីហ្កាហ្សា ប្រឈមមុខនឹងភារកិច្ចដែលត្រូវកសាងឡើងវិញនៃ "រយៈពេលជាង ៦០ឆ្នាំនៃការអភិវឌ្ឍដែលបានបាត់បង់" ក្នុងអំឡុងពេលសង្រ្គាម ១៥ខែរវាងអ៊ីស្រាអែល និងក្រុមហាម៉ាស។

បន្ទាប់ពីការចាប់ផ្តើមនៃបទឈប់បាញ់នៅថ្ងៃទី១៩ ខែមករា ការយកចិត្តទុកដាក់បានងាកទៅរកការជួយប្រជាជនក្នុងការកសាងជីវិតរបស់ពួកគេឡើងវិញនៅក្នុងតំបន់ហ្កាហ្សា។ អង្គការសហប្រជាជាតិ ប៉ាន់ស្មានថាមានកម្ទេចថ្មប្រហែលជាង ៥០លានតោននៅពាសពេញតំបន់ហ្កាហ្សាស្ទ្រីប បន្ទាប់ពីតួលេខជាងពីរភាគបីនៃហេដ្ឋារចនាសម្ព័ន្ធត្រូវបានបំផ្លាញ នៅក្នុងការវាយប្រហារតាមអាកាស និងការលុកលុយរបស់អ៊ីស្រាអែល។

លោក Steiner ប្រធានអង្គការ UNDP បាននិយាយក្នុងបទសម្ភាសន៍នៅឯវេទិកាសេដ្ឋកិច្ចពិភពលោកក្នុងទីក្រុង Davos ប្រទេសស្វីសថា "យើងដាក់ការប៉ាន់ប្រមាណថា ៦០ឆ្នាំជាងនៃការអភិវឌ្ឍន៍ដែលបានបាត់បង់នៅហ្កាហ្សា ហើយ ៦៧% នៃហេដ្ឋារចនាសម្ព័ន្ធត្រូវបានខូចខាត ឬបំផ្លាញ"។

អង្គការសហប្រជាជាតិនិយាយថា ដំណើរការនៃការកសាងសង្គមឡើងវិញនៅទីនោះ ទំនងជាត្រូវចំណាយពេលច្រើនទសវត្សរ៍ ដោយការចំណាយមានរហូតដល់ ៨០ពាន់លានដុល្លារ៕