ព្យុះរដូវរងាជាប្រវត្តិសាស្ត្របានឆក់យកជីវិតមនុស្សយ៉ាងតិច ៩នាក់នៅទូទាំងភាគខាងត្បូងសហរដ្ឋអាមេរិក ខណៈសេវាកម្មអាកាសធាតុជាតិបានពណ៌នាថា នេះជា "ព្រឹត្តិការណ៍ព្យុះរដូវរងាដ៏កម្រប្រចាំជំនាន់" ជាមួយនឹងព្រិលធ្លាក់មិនធ្លាប់មានពីមុនមក ធ្វើឱ្យតំបន់ឈូងសមុទ្រប៉ាស៊ីហ្វិក ស្ថិតក្នុងស្ថានភាពដ៏ត្រជាក់។

ទីក្រុង New Orleans កាលពីថ្ងៃពុធ (២២ មករា) បានបំបែកកំណត់ត្រាធ្លាក់ព្រិលរបស់ខ្លួនជាមួយនឹងតួលេខ ៨អ៊ីញ ដោយលើសពីកំណត់ត្រាកាលពីឆ្នាំ១៩៦៣ ដែលមានកម្រាស់ព្រិលត្រឹមតែ ២,៧អ៊ីញ។ ទីក្រុង Molino រដ្ឋ Florida ក៏បានបំបែកកំណត់ត្រាព្រិលធ្លាក់កម្រិត ៥,៥អ៊ីញ ខណៈក្រុង Mobile នៅរដ្ឋ Alabama បានមើលឃើញតួលេខមិនធ្លាប់មានពីមុនមកលើសពី ៥អ៊ីញ។

ព្យុះបានបង្កការរំខានជាច្រើនដល់ការធ្វើដំណើរ ខណៈជើងហោះហើររាប់ពាន់ត្រូវបានផ្អាកឬលុបចោល ផ្លូវហាយវេ រួមទាំងសាលារៀន និងការិយាល័យរដ្ឋាភិបាលទូទាំងភាគខាងត្បូងបានបន្តបិទ។

ក្រុមមន្ត្រីបានជំរុញអ្នកស្រុកមិនឱ្យចេញក្រៅផ្ទះ ខណៈសីតុណ្ហភាពត្រជាក់ និងស្ថានភាពផ្លូវគ្រោះថ្នាក់នៅតែមាន។ រដ្ឋ Louisiana, Mississippi, Georgia, Alabama និង Florida បានប្រកាសដាក់ក្នុងគ្រាអាសន្ន ដោយព្រិលត្រូវបានគេរំពឹងថានឹងធ្វើឱ្យផ្លូវមានស្ថានភាពគ្រោះថ្នាក់ជាច្រើនថ្ងៃទៀត៕