លោកប្រធានាធិបតីអាមេរិក Donald Trump បាននិយាយកាលពីថ្ងៃព្រហស្បតិ៍ ២៣ មករាសប្ដាហ៍នេះ ថា លោកមិនប្រាកដថា សហរដ្ឋអាមេរិកគួរតែចំណាយអ្វីលើអង្គការណាតូនោះទេ ដោយប្រាប់អ្នកសារព័ត៌មានថា សហរដ្ឋអាមេរិកកំពុងការពារសមាជិកណាតូ ប៉ុន្តែពួកគេមិនការពារយើងទេ។

លោក Trump បានទាមទារដដែលៗថាសមាជិកផ្សេងទៀតនៃសម្ព័ន្ធភាពឆ្លងអាត្លង់ទិកមួយនេះ ត្រូវតែចំណាយ ៥% នៃផលិតផលក្នុងស្រុកសរុប (GDP) របស់ពួកគេលើវិស័យការពារជាតិ ជាការកើនឡើងយ៉ាងខ្លាំងពីគោលដៅ ២% បច្ចុប្បន្ន និងកម្រិតដែលគ្មានប្រទេសសមាជិកណាតូណាមួយ រួមទាំងសហរដ្ឋអាមេរិក បានឈានដល់នាពេលបច្ចុប្បន្ននេះទេ។

លោក Trump បានប្រាប់ក្រុមអ្នកសារព័ត៌មានបន្ទាប់ពីចុះហត្ថលេខាលើក្រឹត្យនៅក្នុងការិយាល័យ ប្រធានាធិបតី Oval Office ថាលោកមិនប្រាកដថាយើងគួរតែចំណាយអ្វីនោះទេ។យើងការពារពួកគេតែពួកគេមិនការពារយើងទេ។

លោកបានថ្លែងថា ពួកគេគួរតែដំឡើងពី ២ ភាគរយទៅ ៥ ភាគរយ ដោយបញ្ជាក់ជាថ្មីលើការអត្ថាធិប្បាយរបស់លោកកាលពីកន្លងទៅ ទៅកាន់វេទិកាសេដ្ឋកិច្ចពិភពលោកនៅទីក្រុង Davos ប្រទេសស្វីសនៅសប្ដាហ៍នេះ។

ទីក្រុងវ៉ាស៊ីនតោនផ្តល់ហិរញ្ញប្បទាន១៥,៨% នៃការចំណាយប្រចាំឆ្នាំរបស់សម្ព័ន្ធភាពយោធាដែលមានសមាជិក៣២ប្រទេស ប្រហែល ៣,៥ពាន់លានដុល្លារ៕