បាតុកររាប់រយនាក់បានតវ៉ានៅទីក្រុង Culiacan ភាគខាងលិចប្រទេសម៉ិកស៊ិក កាលពីថ្ងៃព្រហស្បតិ៍ (២៣ មករា) ដើម្បីទាមទារយុត្តិធម៌ បន្ទាប់ពីឃាតកម្មដ៏សោកសៅលើក្រុមគ្រួសារមួយដែលមានឪពុក និងកូនប្រុសតូចពីរនាក់ត្រូវបានសម្លាប់។

ក្រុមបាតុករបានសម្រុកចូលវិមានរដ្ឋាភិបាលក្នុងទីក្រុង Culiacan ហើយបានជំរុញអាជ្ញាធរឱ្យដោះស្រាយយ៉ាងមានប្រសិទ្ធភាពលើអំពើហិង្សាក្នុងតំបន់ដែលកំពុងកើនឡើងយ៉ាងខ្លាំង និងធ្វើឱ្យអ្នកស្រុកភ័យខ្លាច។ ក្រុមបាតុករបានសម្រុកចូលទៅក្នុងអគារ និងលើកបង្ហាញរូបថតជនរងគ្រោះនៅទីធ្លាកណ្តាលនៃសាលរបស់សាលាក្រុង និងស្រែកពាក្យតវ៉ា។

យោងតាមប្រព័ន្ធផ្សព្វផ្សាយក្នុងស្រុកបានឱ្យដឹងថា ក្រុមគ្រួសារដែលត្រូវសម្លាប់នោះ បានរងគ្រោះដោយការប៉ុនប៉ងប្លន់កាលពីថ្ងៃអាទិត្យ (១៩ មករា) នៅពេលដែលខ្មាន់កាំភ្លើងជាច្រើននាក់បានសម្លាប់ឪពុក និងកូនប្រុសពីរនាក់របស់គេ ដែលមានអាយុ ៩ឆ្នាំ និង ១២ឆ្នាំ។

អំពើហិង្សានៅរដ្ឋ Sinaloa កាន់តែខ្លាំងក្លាឡើងក្នុងប៉ុន្មានខែថ្មីៗនេះ ដែលជំរុញដោយការតស៊ូអំណាចរវាងក្រុមគូប្រជែងនៃក្រុមឧក្រិដ្ឋជនគ្រឿងញៀន Sinaloa Cartel។ ជម្លោះនេះបានផ្ទុះឡើងកាន់តែធំ បន្ទាប់ពីមានការចាប់ខ្លួនមេជួញដូរគ្រឿងញៀនដ៏មានឥទ្ធិពលឈ្មោះ Ismael Zambada ហៅក្រៅថា El Mayo នៅលើទឹកដីសហរដ្ឋអាមេរិក កាលពីថ្ងៃទី២៥ ខែកក្កដា មក៕