ប្រទេសប្រេស៊ីលមើលឃើញឱកាស ដើម្បីបង្កើនសំឡេងរបស់ប្រទេសកំពុងអភិវឌ្ឍន៍ នៅក្នុងកិច្ចពិភាក្សាហិរញ្ញវត្ថុអាកាសធាតុ នាពេលខាងមុខ។ នេះបើយោងតាមការអត្ថាធិប្បាយ កាលពីថ្ងៃព្រហស្បតិ៍ (ទី២៣ ខែមករា) ពីប្រមុខនៃកិច្ចប្រជុំកំពូលសកលស្ដីពីអាកាសធាតុ COP30 ដែលនឹងត្រូវធ្វើជាម្ចាស់ផ្ទះដោយប្រជាជាតិអាមេរិកខាងត្បូង នៅចុងឆ្នាំនេះ។

ការអត្ថាធិប្បាយពីលោក Andre Correa do Lago កើតឡើងនៅពេលដែលមេដឹកនាំពិភពលោក កំពុងដោះស្រាយជាមួយនឹងការចាកចេញពីកិច្ចព្រមព្រៀងអាកាសធាតុទីក្រុងប៉ារីសរបស់សហរដ្ឋអាមេរិក ដែលបញ្ជាដោយប្រធានាធិបតីថ្មីរបស់សហរដ្ឋអាមេរិក គឺលោក Donald Trump។

លោក Correa do Lago បានប្រាប់អ្នកសារព័ត៌មាននៅទីក្រុង Brasilia ថា ការចរចាទំនងជានឹង «ពិបាក» នៅក្នុងកិច្ចប្រជុំកំពូល COP30 បើប្រៀបធៀបទៅនឹងកិច្ចប្រជុំកាលពីឆ្នាំមុន នៅពេលដែលសហរដ្ឋអាមេរិកបាន «ចូលរួម ក្នុងការមានគោលនយោបាយ ដើម្បីប្រយុទ្ធប្រឆាំងនឹងបម្រែបម្រួលអាកាសធាតុ»។

ការរំពឹងទុកសម្រាប់ COP30 ដែលនឹងត្រូវរៀបចំនៅទីក្រុង Belem ក្នុងខែវិច្ឆិកា រួមមានការពិភាក្សាលើជម្លោះដ៏យូរអង្វែង ជុំវិញថា តើអ្នកណានឹងចំណាយសម្រាប់ប្រទេសក្រីក្រ ដើម្បីផ្លាស់ប្តូរសេដ្ឋកិច្ចរបស់ពួកគេទៅជាថាមពលស្អាត និងដោះស្រាយផលប៉ះពាល់ពីការឡើងកម្ដៅផែនដី។

អំឡុងកិច្ចប្រជុំកំពូលកាលពីឆ្នាំមុន នៅប្រទេសអាសែប៊ៃហ្សង់ មានការខ្វែងគំនិតគ្នាយ៉ាងតានតឹង រវាងប្រទេសអ្នកមាន និងប្រទេសក្រីក្រ។ វាបានបញ្ចប់ដោយការសន្យាពីប្រទេសអ្នកមាន ក្នុងការបរិច្ចាគ ៣០០ពាន់លានដុល្លារជារៀងរាល់ឆ្នាំ នៅឆ្នាំ២០៣៥ ដើម្បីជួយផ្តល់មូលនិធិដល់ការផ្លាស់ប្តូរទៅជាថាមពលស្អាត និងកាត់បន្ថយផលប៉ះពាល់អវិជ្ជមានពីការប្រែប្រួលអាកាសធាតុ។

ប៉ុន្តែការសន្យានេះគឺមានតែមួយចំណែកនៃទឹកប្រាក់ ១,៣សែនកោដិលានដុល្លារ ក្នុងមួយឆ្នាំដែលប្រទេសកំពុងអភិវឌ្ឍន៍ ទាមទារ។ លោក Correa do Lago បានកត់សម្គាល់ថា ប្រទេសអ្នកមានចង់កាត់បន្ថយការរួមចំណែកផ្នែកហិរញ្ញវត្ថុរបស់ពួកគេដែលលោកបានពិពណ៌នាថា ជា «កំហុសឆ្គងយ៉ាងធ្ងន់ធ្ងរ»៕