អាជ្ញាធរថ្មីរបស់ប្រទេសស៊ីរី កំពុងប្រើប្រាស់ការបង្រៀនបែបសាសនាឥស្លាម ដើម្បីបណ្តុះបណ្តាលកងកម្លាំងនគរបាលថ្មី ក្នុងសកម្មភាពមួយដែលមន្រ្តីបាននិយាយថាមានគោលបំណងដើម្បីបណ្តុះស្មារតីសីលធម៌ នៅក្នុងប្រឹងប្រែងបំពេញភាពទំនេរនៃសន្តិសុខ បន្ទាប់ពីរុះរើកងកម្លាំងសន្តិសុខដែលពុករលួយ និងឃោរឃៅរបស់អតីតប្រធានាធិបតីដែលត្រូវបណ្តេញចេញពីតំណែងលោក Bashar al-Assad។

ប្រភពជាន់ខ្ពស់ និងពាក្យស្នើសុំចូលធ្វើនគរបាលបានបង្ហាញថា អាជ្ញាធរទីក្រុងដាម៉ាស បានសាកសួរអ្នកដាក់ពាក្យពីជំនឿសាសនារបស់ពួកគេ និងផ្តោតលើច្បាប់ឥស្លាម សារៀ (Sharia) ក្នុងការបណ្តុះបណ្តាលខ្លី ដែលពួកគេផ្តល់ជូនអ្នកត្រូវជ្រើសរើសឱ្យធ្វើការ។

ការធានាស្ថិរភាព និងទទួលបានទំនុកចិត្តពីប្រជាជននៅទូទាំងស៊ីរី នឹងមានសារៈសំខាន់សម្រាប់ក្រុមឥស្លាមនិកាយស៊ុននី ដើម្បីពង្រឹងការគ្រប់គ្រងរបស់ពួកគេ។ ប៉ុន្តែអ្នកវិភាគក្នុងតំបន់ព្រមានថា ការដាក់សាសនាជាចំណុចកណ្តាលនៃនគរបាល ប្រថុយនឹងបង្កើតការប្រេះឆាថ្មីនៅក្នុងប្រទេសសម្បូរដោយភាពចម្រុះមួយនេះ បន្ទាប់ពី ១៣ឆ្នាំនៃសង្រ្គាមស៊ីវិល និងពិបាកផ្ដល់ទំនុកចិត្តដល់រដ្ឋាភិបាលបរទេស។

មេដឹកនាំតាមជាក់ស្ដែងរបស់ស៊ីរី លោក Ahmed al-Sharaa បានធានាដល់មន្ត្រីលោកខាងលិច និងរដ្ឋាភិបាលមជ្ឈិមបូព៌ា ដែលព្រួយបារម្ភពីចលនាឥស្លាមនិយមផ្ទាល់ខ្លួនក្រុមលោក al-Sharaa ដោយនិយាយថា បក្សពួករបស់លោកបានលះបង់ទំនាក់ទំនងកាលពីមុនរបស់ខ្លួនជាមួយក្រុមអាល់កៃដា ហើយនឹងគ្រប់គ្រងដោយប្រកាន់ជំហរកណ្ដាល រួមទាំងការពារជនជាតិភាគតិចកាន់សាសនាផ្សេងគ្នា៕