ទីភ្នាក់ងារកុមាររបស់អង្គការសហប្រជាជាតិ (UN) កាលពីថ្ងៃព្រហស្បតិ៍ (ទី២៣ ខែមករា) បានរាយការណ៍ថា ស្ថានភាពអាកាសធាតុអាក្រក់ធ្ងន់ធ្ងរខ្លាំង បានរំខានដល់ការសិក្សារបស់កុមារប្រហែល ២៤២លាននាក់ នៅក្នុងប្រទេសចំនួន៨៥ ក្នុងឆ្នាំ២០២៤ ដែលប្រហែលជាមានម្នាក់ ក្នុងចំណោមសិស្សចំនួន ៧នាក់ ដោយបានរិះគន់នូវអ្វីដែលខ្លួនបាននិយាយថា ជា «ការមើលរំលង» ដល់ទិដ្ឋភាពនៃវិបត្តិអាកាសធាតុ។

របាយការណ៍បានបង្ហាញថា រលកកម្ដៅមានផលប៉ះពាល់ដ៏ខ្លាំងបំផុត ខណៈដែលនាយកប្រតិបត្តិរបស់អង្គការយូនីសេហ្វ (UNICEF) លោកស្រី Catherine Russell បានព្រមានថា កុមារ គឺ «ងាយរងគ្រោះ» ដោយសារស្ថានភាពអាកាសធាតុអាក្រក់ខ្លាំង។

លោកស្រីបានលើកឡើងនៅក្នុងសេចក្តីថ្លែងការណ៍ថា៖ «ពួកគេឡើងកម្ដៅលឿន ពួកគេបែកញើសតិច ហើយរាងកាយរបស់ពួកគេត្រជាក់យឺតជាងមនុស្សពេញវ័យ។ កុមារមិនអាចផ្តោតអារម្មណ៍ ក្នុងថ្នាក់រៀន ដែលមានកម្ដៅក្ដៅខ្លាំងឡើយ ហើយពួកគេមិនអាចទៅសាលារៀនបានទេ ប្រសិនបើផ្លូវត្រូវបានជន់លិច ឬប្រសិនបើសាលារៀនត្រូវរងការខូចខាតដោយសារទឹកជំនន់។

យ៉ាងណាក្ដី របាយការណ៍របស់អង្គការយូនីសេហ្វ បានបញ្ជាក់បន្ថែមថា ចំនួន ២៤២លាននាក់ គឺគ្រាន់តែជាតួលេខ «ប៉ាន់ប្រមាណក្នុងកម្រិតទាប» ប៉ុណ្ណោះ ដោយទទួលស្គាល់ពីការមានភាពចន្លោះ នៅក្នុងទិន្នន័យ។

សកម្មភាពរបស់មនុស្ស ក្នុងនោះរួមទាំងការដុតឥន្ធនៈហ្វូស៊ីលដែលមិនមានការរឹតបន្តឹង ក្នុងរយៈពេលជាច្រើនទសវត្សរ៍មកនេះ បានធ្វើឲ្យភពផែនដីឡើងកម្តៅ និងនាំឲ្យមានបម្រែបម្រួលអាកាសធាតុ។ សីតុណ្ហភាពជាមធ្យមរបស់ភពផេនដី បានឡើងដល់កម្រិតខ្ពស់បំផុត ក្នុងឆ្នាំ២០២៤ ហើយក្នុងរយៈពេលប៉ុន្មានឆ្នាំចុងក្រោយនេះ កម្ដៅបានឡើងលើសកម្រិត ១,៥អង្សាសេជាបណ្តោះអាសន្នលើកដំបូង៕