អគ្គរដ្ឋអាជ្ញារបស់តុលាការឧក្រិដ្ឋកម្មអន្តរជាតិ (ICC)បានប្រកាសកាលពីថ្ងៃព្រហស្បតិ៍ថា លោកបានស្នើសុំដីកាចាប់ខ្លួនមន្ត្រីជាន់ខ្ពស់តាលីបង់អាហ្វហ្គានីស្ថានចំនួនពីររូប ជុំវិញការគាបសង្កត់លើស្ត្រី។

លោក Karim Khan បាននិយាយនៅក្នុងសេចក្តីថ្លែងការណ៍មួយថា លោកបានស្នើឲ្យក្រុមចៅក្រមអនុ  ម័តដីកាសម្រាប់មេដឹកនាំជាន់ខ្ពស់របស់ក្រុមគឺលោក Hibatullah Akhunzada និងប្រធានតុលាការកំពូលរបស់ប្រទេសអាហ្វហ្គានីស្ថានលោក Abdul Hakim Haqqani ដោយចោទប្រកាន់បុរសទាំងពីរនាក់ ពីបទឧក្រិដ្ឋកម្មប្រឆាំងមនុស្សជាតិ ជុំវិញការធ្វើទុក្ខបុកម្នេញលើយេនឌ័រ។

លោក Khan បានបញ្ជាក់ថា៖«កម្មវិធីទាំងនេះ ទទួលស្គាល់ថា ស្ត្រី និងក្មេងស្រីអាហ្វហ្គានីស្ថាន ក៏ដូចជាសហគមន៍អ្នកស្រឡាញ់ភេទដូចគ្នា កំពុងប្រឈមមុខនឹងការបៀតបៀន ដែលមិនធ្លាប់មានពីមុនមក ហួសហេតុ និងកំពុងបន្តដោយក្រុមតាលីបង់»។

ចាប់តាំងពីពួកគេ បានគ្រប់គ្រងប្រទេសឡើងវិញ នៅឆ្នាំ ២០២១ ក្រុមតាលីបង់ បានរារាំងស្ត្រីពីការងារ កន្លែងសាធារណៈភាគច្រើន និងការអប់រំលើសពីថ្នាក់ទី៦។ កាលពីឆ្នាំមុន លោក Akhundzada បានហាមឃាត់អគារមិនឲ្យមានបង្អួចមើលទៅកន្លែង ដែលស្ត្រីអាចអង្គុយឬឈរបាន។

ក្រុមសិទ្ធិមនុស្ស សាទរចំពោះចំណាត់ការរបស់តុលាការ ICC ប្រឆាំងនឹងថ្នាក់ដឹកនាំតាលីបង់។

លោកស្រី Liz Evenson ប្រធានផ្នែកយុត្តិធម៌អន្តរជាតិនៃអង្គការឃ្លាំមើលសិទ្ធិមនុស្ស បាននិយាយនៅក្នុងសេចក្តីថ្លែងការណ៍មួយថា៖«ការរំលោភបំពានជាប្រព័ន្ធរបស់ពួកគេលើសិទ្ធិស្ត្រី និងកុមារី រួមទាំងការហាមប្រាមក្នុងការអប់រំ និងការគាបសង្កត់លើអ្នកដែលនិយាយទាមទារសិទ្ធិស្ត្រី បានកើនឡើង ជាមួយនឹង    និទណ្ឌភាពពេញលេញ។ ដោយមិនមានយុត្តិធម៌ជាក់ស្តែង នៅក្នុងប្រទេសអាហ្វហ្គានីស្ថាន សំណើសុំដីកាចាប់ខ្លួននេះ ផ្តល់ផ្លូវសំខាន់មួយឈានទៅរកវិធានការនៃការទទួលខុសត្រូវ»។