គណៈកម្មាធិការអន្តរជាតិនៃកាកបាទក្រហម បាននិយាយថា ក្រុមឧទ្ទាមហ៊ួទីនៅប្រទេសយេម៉ែន បានដោះលែងអ្នកទោសសង្គ្រាម ១៥៣នាក់ ជាឯកតោភាគី នៅថ្ងៃសៅរ៍នេះ។  

ក្រុមហ៊ួទី បានផ្តល់សញ្ញាកាលពីយប់ថ្ងៃសុក្រថា ពួកគេគ្រោងនឹងដោះលែងអ្នកទោស ដែលជាផ្នែកមួយនៃកិច្ចខិតខំប្រឹងប្រែងរបស់ពួកគេ ដើម្បីបន្ធូរបន្ថយភាពតានតឹង បន្ទាប់ពីបទឈប់បាញ់ នៅក្នុងសង្គ្រាមអ៊ីស្រាអែល និងក្រុមហាម៉ាស នៅតំបន់ហ្កាហ្សាស្ទ្រីប។

ទោះបីជាយ៉ាងណាក៏ដោយ ការដោះលែងនេះ ធ្វើឡើង បន្ទាប់ពីក្រុមហ៊ួទីចាប់ឃុំខ្លួនបុគ្គលិកយេម៉ែន ៧ នាក់ផ្សេងទៀត ពីអង្គការសហប្រជាជាតិ ដោយបង្កឲ្យមានកំហឹងពីស្ថាប័នពិភពលោក។

កាកបាទក្រហម បាននិយាយថា ខ្លួនស្វាគមន៍ការដោះលែងឯកតោភាគីនេះ ជាជំហានវិជ្ជមានមួយទៀតឆ្ពោះទៅរកការចរចារឡើងវិញ» ជុំវិញការបញ្ចប់សង្រ្គាមដ៏រ៉ាំរ៉ៃរបស់ប្រទេសនេះ។