សេតវិមានបាននិយាយកាលពីថ្ងៃអាទិត្យ២៦ ខែមករា ថាកិច្ចព្រមព្រៀងរវាងប្រទេសលីបង់ និងអ៊ីស្រាអែល ត្រូវបានបន្តរហូតដល់ថ្ងៃទី ១៨ កុម្ភៈ ខណៈអ៊ីស្រាអែល បានខកខានពេលវេលាកំណត់ក្នុងការដកទ័ពចេញ។

សេតវិមានបាននិយាយនៅក្នុងសេចក្តីថ្លែងការណ៍ខ្លីមួយថា ការរៀបចំរវាងប្រទេសលីបង់ និងអ៊ីស្រាអែល ដែលត្រូវបានត្រួតពិនិត្យដោយសហរដ្ឋអាមេរិក នឹងបន្តអនុវត្តរហូតដល់ថ្ងៃទី១៨ ខែកុម្ភៈ ឆ្នាំ ២០២៥ ។

សេតវិមានរបស់លោក Donald Trump ក៏បាននិយាយផងដែរថា សហរដ្ឋអាមេរិកនឹងចរចាជាមួយអ៊ីស្រាអែល និងលីបង់ សម្រាប់ការវិលត្រឡប់អ្នកទោសលីបង់ ដែលត្រូវបានចាប់ខ្លួនចាប់តាំងពីថ្ងៃទី ៧ ខែតុលា ឆ្នាំ២០២៣ ក្នុងការវាយប្រហាររបស់ក្រុមហាម៉ាស លើអ៊ីស្រាអែល ដែលនាំមកនូវការប្រយុទ្ធគ្នាស្របគ្នានឹងនៅដែនដីហ្កាហ្សា រវាងអ៊ីស្រាអែល និងក្រុមហេសបូឡា របស់ប្រទេសលីបង់។

សេចក្តីថ្លែងការណ៍នេះមិនបាននិយាយច្បាស់ពីបទឈប់បាញ់ដែលកាន់តែមានការសង្ស័យ ខណៈកងកម្លាំងអ៊ីស្រាអែលបានសម្លាប់មនុស្ស២២ នាក់កាលពីថ្ងៃអាទិត្យ នេះបើយោងតាមក្រសួងសុខាភិបាលរបស់ប្រទេសលីបង់។ 

សេតវិមានក៏មិនបាននិយាយសំដៅទៅបារាំងដែលធ្វើការជាមួយសហរដ្ឋអាមេរិកក្រោមការដឹកនាំរបស់អតីតប្រធានាធិបតី Joe Biden ដើម្បីឈានដល់បទឈប់បាញ់នៅថ្ងៃទី ២៧ ខែវិច្ឆិកាដែរ។

កិច្ចព្រមព្រៀងនេះបានបញ្ចប់យុទ្ធនាការយោធារបស់អ៊ីស្រាអែលនៅលីបង់ប្រឆាំងនឹងក្រុមហេសបូឡាគាំទ្រដោយអ៊ីរ៉ង់។ នៅក្រោមកិច្ចព្រមព្រៀងរយៈពេល ៦០ ថ្ងៃ កងទ័ពលីបង់ត្រូវដាក់ពង្រាយជាមួយកងកម្លាំងរក្សាសន្តិភាពរបស់អង្គការសហប្រជាជាតិនៅភាគខាងត្បូង នៅពេលកងទ័ពអ៊ីស្រាអែលដកខ្លួនចេញ៕