សហរដ្ឋអាមេរិក បារាំង និងចក្រភពអង់គ្លេស បានដាក់សម្ពាធលើប្រទេសរ៉្វាន់ដា កាលពីថ្ងៃអាទិត្យ ជុំវិញការគាំទ្ររបស់ប្រទេសនេះសម្រាប់ក្រុមឧទ្ទាម ដែលបានបិទទីក្រុងធំបំផុតនៅភាគខាងកើតប្រទេសកុងហ្គោ ខណៈកងកម្លាំងរដ្ឋាភិបាល បានទប់ទល់ដើម្បីបញ្ឈប់ការវាយលុក ដែលបានបង្ខំឱ្យជនស៊ីវិលរាប់ពាន់នាក់ភៀសខ្លួនចេញ។

ដោយក្រុមអ្នកប្រយុទ្ធមកពីចលនាឧទ្ទាម M23 ទំនងជាត្រៀមខ្លួនចូលទៅក្នុងទីក្រុងហ្គោម៉ា ក្រុមប្រឹក្សាសន្តិសុខអង្គការសហប្រជាជាតិ បានជួបប្រជុំគ្នាកាលពីថ្ងៃអាទិត្យដើម្បីពិភាក្សាអំពីការប្រយុទ្ធគ្នា ដែលបានបណ្តាលឲ្យកងរក្សាសន្តិភាពរបស់អង្គការសហប្រជាជាតិបីនាក់ស្លាប់ក្នុងរយៈពេលពីរថ្ងៃចុងក្រោយនេះ។

ក្រុមឧទ្ទាម បានរុលចូលយ៉ាងឆាប់រហ័សក្នុងខែនេះនៅក្នុងទឹកដីសាធារណរដ្ឋប្រជាធិបតេយ្យកុងហ្គោ ដែលសម្បូរទៅដោយរ៉ែ។

ប្រទេសរ៉្វាន់ដា បានបដិសេធការចោទប្រកាន់របស់អង្គការសហប្រជាជាតិ និងប្រទេសដទៃទៀត ថាខ្លួនគាំទ្រចលនាក្រុមឧទ្ទាម M23។

លោក James Kariuki អ្នកតំណាងអចិន្ត្រៃយ៍រងរបស់ចក្រភពអង់គ្លេសប្រចាំនៅអង្គការសហប្រជាជាតិ បាននិយាយទៅកាន់កិច្ចប្រជុំរបស់ក្រុមប្រឹក្សាថា «ការវាយប្រហារររបស់ចលនាក្រុមឧទ្ទាម M23 លើកងកម្លាំងរក្សាសន្តិភាព មានការគាំទ្រពីកងកម្លាំងការពាររ៉្វាន់ដា(RDF) ត្រូវតែបញ្ឈប់ជាបន្ទាន់»។