ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃអាទិត្យ (២៦ មករា) បានទាមទារឱ្យកងកម្លាំងឧទ្ទាម M23 បញ្ឈប់ការវាយលុកដែលកំពុងបន្ត និងការវាយរុលឆ្ពោះទៅកាន់ទីក្រុង Goma ដែលជាទីក្រុងធំជាងគេនៅភាគខាងកើតនៃសាធារណរដ្ឋប្រជាធិបតេយ្យកុងហ្គោ ហើយថា "កងកម្លាំងខាងក្រៅ" នៅក្នុងតំបន់នោះត្រូវដកចេញភ្លាមៗ។

ការទាមទាររបស់ក្រុមប្រឹក្សានេះ បានកើតឡើងតែប៉ុន្មានម៉ោងប៉ុណ្ណោះបន្ទាប់ពីក្រុម M23 ដែលគាំទ្រដោយប្រទេសរ្វ៉ាន់ដា អះអាងថាពួកគេបានដណ្ដើមយកទីក្រុង Goma បន្ទាប់ពីការវាយរុលលឿនដូចរន្ទះ ដែលបង្ខំឱ្យមនុស្សរាប់ពាន់នាក់ភៀសខ្លួន និងជំរុញឱ្យមានក្ដីបារម្ភអំពីសង្រ្គាមក្នុងតំបន់។

នៅក្នុងសេចក្ដីថ្លែងការណ៍មួយ ក្រុមប្រឹក្សា UN បានជំរុញឱ្យរ្វ៉ាន់ដា និងកុងហ្គោ ត្រឡប់ទៅការចរចាដើម្បីសម្រេចបាននូវសន្តិភាព និងដោះស្រាយបញ្ហា ទាក់ទងនឹងវត្តមានរបស់កងកម្លាំងការពាររ្វ៉ាន់ដា ឬហៅថា RDF នៅភាគខាងកើតកុងហ្គោ និងការគាំទ្ររបស់កុងហ្គោ សម្រាប់កងកម្លាំងប្រជាធិបតេយ្យរំដោះរ្វ៉ាន់ដា ឬហៅថា FDLR។

ក្រុម M23 ប្តេជ្ញាការពារផលប្រយោជន៍ជនជាតិ ទូស៊ី (Tutsi) ជាពិសេសប្រឆាំងនឹងកងជីវពលជនជាតិភាគតិច ហ៊ូទូ (Hutu) ដូចជាកងកម្លាំង FDLR ដែលត្រូវបានបង្កើតឡើងដោយជនជាតិហ៊ូទូ ដែលភៀសខ្លួនពីរ្វ៉ាន់ដា បន្ទាប់ពីបានចូលរួមក្នុងការប្រល័យពូជសាសន៍ឆ្នាំ១៩៩៤ នៃជនជាតិទូស៊ី និងជនជាតិហ៊ូទូប្រកាន់ជំហរកណ្ដាល ជាង ៨០០.០០០នាក់៕