នាយករដ្ឋមន្ត្រីឡាតវី លោកស្រី Evika Silina បាននិយាយថា លោកស្រីកំពុងទាក់ទងជាមួយបណ្ដាប្រទេសសមាជិកអង្គការណាតូ (NATO) និងសមុទ្របាល់ទិក បន្ទាប់ពីខ្សែកាបអុបទិកក្រោមសមុទ្រ រវាងប្រទេសឡាតវី និងស៊ុយអែត ត្រូវរងការខូចខាត កាលពីថ្ងៃអាទិត្យ (ទី២៦ ខែមករា)។

អំឡុងពេលថ្លែងទៅកាន់អ្នកសារព័ត៌មាន ក្នុងរដ្ឋធានី Riga បន្ទាប់ពីមានកិច្ចប្រជុំវិសាមញ្ញរបស់រដ្ឋាភិបាល លោកស្រី Silina បានប្រាប់ថា វាទំនងជាបណ្តាលមកពីឥទ្ធិពលខាងក្រៅ ហើយថា កងទ័ពជើងទឹកត្រូវបានដាក់ពង្រាយ ដើម្បីស៊ើបអង្កេតការខូចខាតនេះ និងត្រួតពិនិត្យនាវាដែលសង្ស័យថា មានជាប់ពាក់ព័ន្ធ។

ជាមួយគ្នានេះ លោកស្រី Silina បានបន្ថែមថា៖ «វាក៏ច្បាស់ផងដែរថា ការស៊ើបអង្កេតនឹងត្រូវតែមានឡើងនៅកម្រិតនីតិវិធីព្រហ្មទណ្ឌ»។

ចំណែកកងនាវាចរឡាតវី បានប្រាប់ឲ្យដឹងថា នាវា ២គ្រឿងផ្សេងទៀត នៅក្នុងតំបន់នេះ ក៏ស្ថិតនៅក្រោមការស៊ើបអង្កេតផងដែរ។ នាយករដ្ឋមន្ត្រីស៊ុយអែត លោក Ulf Kristersson បានប្រាប់ថា ប្រទេសរបស់លោកកំពុងសហការយ៉ាងជិតស្និទ្ធជាមួយឡាតវី និងអង្គការណាតូ។ ហើយអាជ្ញាធរអយ្យការរបស់ប្រទេសស៊ុយអែត បានឲ្យដឹងថា សេវាសន្តិសុខរបស់ប្រទេសបានរឹបអូសគ្រប់គ្រងនាវា ១គ្រឿងដែលជាផ្នែកនៃការស៊ើបអង្កេតនេះ។

គួរបញ្ជាក់ថា អង្គការណាតូបាននិយាយកាលពីសប្តាហ៍មុនថា ខ្លួននឹងដាក់ពង្រាយនាវាចម្បាំង យន្តហោះល្បាត និងយានដ្រូនរបស់កងទ័ពជើងទឹក នៅសមុទ្របាល់ទិក ដើម្បីជួយការពារហេដ្ឋារចនាសម្ព័ន្ធសំខាន់ៗ និងរក្សាសិទ្ធិ ក្នុងការចាត់វិធានការប្រឆាំងនឹងនាវាដែលសង្ស័យថា មានការគំរាមកំហែងផ្នែកសន្តិសុខ៕