អាជីវករលក់ដូរនៅផ្សារអូរឫស្សី រាជធានីភ្នំពេញ នៅក្នុងឱកាសបុណ្យចូលឆ្នាំប្រពៃណីចិន បាន​លក់​ដូរ​ដាច់​កាក់​កប​លើពី​ថ្ងៃធម្មតា ខណៈប្រជាពលរដ្ឋជាច្រើនបានសម្រុកទៅទិញឥវ៉ាន់ ជា​ពិសេស​បន្លែ ផ្លែឈើ ត្រីសាច់នានា ដើម្បីរៀបចំសែនព្រេន និងផ្គត់ផ្គង់ដល់ ការហូបចុក​នៅ​ក្នុង​ឱកាស​នេះ។

ទាក់ទិននិងការបុណ្យទានម្តងៗដូចជា បុណ្យចូលឆ្នាំប្រពៃណីខ្មែរ, រដូវបុណ្យភ្ជុំបិណ្ឌ, និង​បុណ្យ​ចូល​ឆ្នាំ​ប្រពៃណីចិនជាដើម ក្រុមអាជីវករនៅតាមផ្សារ មិនថានៅរាជធានីភ្នំពេញ ឬតាមបណ្តា​ខេត្ត​​នោះឡើយ ពួកគេបានត្រៀមឥវ៉ាន់ដើម្បីលក់ដូរ ព្រោះថានៅក្នុង ឱកាសបុណ្យធំម្តងៗ ប្រជា​ពលរដ្ឋតែងតែសម្រុកទិញឥវ៉ាន់ដូចជា សម្លៀកបំពាក់ គ្រឿងអលង្ការ សម្ភារៈផ្គត់ផ្គង់ផ្ទះបាយ និង​គ្រឿង បរិភោគឧបភោគនានា ជាក់ស្តែងនៅក្នុងឱកាសបុណ្យចូលឆ្នាំប្រពៃណីចិននេះដើម ឃើញ​ថា ក្រុមអាជីវករលក់ដូរ ជាពិសេសការលក់ ដូរ បន្លែ ផ្លែឈើ និងត្រីសាច់នានា នៅរាជធានីភ្នំពេញ មាន​ភាព​មមាញឹកយ៉ាងខ្លាំង ខណៈប្រជាពលរដ្ឋនៅក្នុងឱកាសនេះ ភាគច្រើន ទិញបន្លែ ផ្លែឈើ ត្រីសាច់ ដើម្បីរៀបចំសែនព្រេន និងការរៀបចំផ្សេងៗ ជាពិសេស​អ្នក​ដែល​ជាប់​សែស្រឡាយ​ចិន​ជា​ដើម​។

ជុំវិញការលក់ដូរនេះ, ក្រុមអាជីវករដែលលក់ដូរត្រីសាច់ បន្លែ ផ្លែឈើ នៅផ្សារអូរឫស្សី បាន​ថ្លែង​ឱ្យ​ដឹង​ថា ជារៀងរាល់ឆ្នាំ នៅពេលជិតដល់ថ្ងៃបុណ្យចូលឆ្នាំប្រពៃណីចិន ពួកគាត់​បាន​លក់​ដាច់​ខុស​ថ្ងៃ​ធម្មតា ជាក់ស្តែងមុនថ្ងៃបុណ្យចូលឆ្នាំចិនមួយថ្ងៃ ពួកគាត់ លក់ដាច់កើនមួយជាពីរដង និង​រំពឹង​ថា នៅក្នុងថ្ងៃនេះនិងថ្ងៃស្អែកនឹងលក់ដាច់ដូចគ្នា។ ចំណែកតម្លៃលក់ចេញវិញ ក្រុមអាជីវករ បាន ថ្លែងឱ្យដឹងថា នៅក្នុងឱកាសនេះ ចំពោះសាច់ជ្រូក បានលក់លើសពីថ្ងៃធម្មតាបន្តិចបន្ទួច (ជា​ពិសេសសាច់បីជាន់) ចំណែកសាច់មាន ក៏មានការប្រែប្រួលតម្លៃខ្លះៗ។ ដោយ​ឡែក​បន្លែ​ផ្លែ​ឈើ​វិញ ឃើញថា នៅក្នុងឱកាសនេះផងដែរ ក៏មានការដាក់លក់សម្រាប់ផ្គត់ផ្គង់ តម្រូវ​ការ​ហូប​ចុក​យ៉ាង​ច្រើនផងដែរ មិនថានៅផ្សារអូរឫស្សី ឬផ្សារផ្សេងៗទៀត នៅក្នុងរាជធានី​ភ្នំពេញ​នោះ​ឡើយ​។

ជុំវិញការផ្គត់ផ្គង់សាច់ក្នុងឱកាសនេះដែរ, ថ្មីៗនេះ លោក ស្រ៊ុន ពៅ ប្រធាន​សមាគម​អ្នក​ចិញ្ចឹម​សត្វ​នៅ​កម្ពុជា ថ្លែងលើក ឡើងថា សម្រាប់តម្រូវការផ្គត់ផ្គង់ជ្រូករស់នៅថ្ងៃធម្មតា ក្នុងរង្វង់ជាង ៨ ពាន់ ទៅ ៩ ពាន់ក្បាលក្នុងមួយថ្ងៃៗ ចំណែកនៅក្នុងពិធីបុណ្យ ចូលឆ្នាំចិននេះ តម្រូវការផ្គត់ផ្គង់​ជ្រូក​រស់​នៅ​តាម​ទីផ្សារនឹងអាចហក់ឡើងជាង ១ ម៉ឺន ១ ពាន់ក្បាល ក្នុងមួយថ្ងៃ ខណៈ​ការ​ផ្គត់​ផ្គង់​មាន់​ ទា ក៏អាចហក់ឡើងជាង ១០ ម៉ឺនក្បាលផងដែរ។ ដោយឡែកតម្លៃលក់រាយវិញ លោក​បាន​បញ្ជាក់​ថា នៅក្នុងបុណ្យចូលឆ្នាំប្រពៃណី ចិននេះ តម្លៃសាច់ជ្រូក មាន់ ទា នឹងអាចប្រែ​ប្រួល​ខ្លះ​ខុស​ពី​ថ្ងៃធម្មតា តែមិនអាចហក់ឡើងខ្ពស់ហួសហេតុនោះឡើយ៕ អត្ថបទ៖ សុន រ៉ាឌី