ប្រធានគោលនយោបាយការបរទេសរបស់ប្លុកអឺរ៉ុប លោកស្រី កាចា កាឡាស (Kaja Kallas) បាននិយាយកាលពីថ្ងៃចន្ទ (២៧ មករា) ថា បណ្ដារដ្ឋមន្ត្រីការបរទេសសហភាពអឺរ៉ុប បានយល់ព្រមលើផែនទីបង្ហាញផ្លូវដើម្បីបន្ធូរបន្ថយទណ្ឌកម្មលើប្រទេសស៊ីរី ប៉ុន្តែក៏ព្រមានថា ខណៈអឺរ៉ុបមានបំណងឆ្ពោះទៅមុខយ៉ាងលឿនលើរឿងនេះ ការដកទណ្ឌកម្មអាចត្រូវបញ្ច្រាសមកវិញ ប្រសិនបើអនុវត្តជំហានខុស។

សហភាពអឺរ៉ុបមានការដាក់ទណ្ឌកម្មជាច្រើនក្នុងការកំណត់គោលដៅទាំងបុគ្គល និងផ្នែកសេដ្ឋកិច្ចក្នុងប្រទេសស៊ីរី រួមទាំងបម្រាមលើការនាំចេញប្រេងរបស់ស៊ីរី និងការរឹតបន្តឹងលើការចូលទៅកាន់បណ្តាញហិរញ្ញវត្ថុសកល។

ប៉ុន្តែបណ្ដារដ្ឋធានីអឺរ៉ុបបានចាប់ផ្តើមវាយតម្លៃឡើងវិញនូវវិធីសាស្រ្តរបស់ពួកគេ បន្ទាប់ពីលោក Bashar al-Assad ត្រូវបានបណ្តេញចេញពីតំណែងជាប្រធានាធិបតីក្នុងខែធ្នូ ដោយកងកម្លាំងបះបោរដឹកនាំដោយក្រុមឥស្លាមនិយម HTS។

រដ្ឋាភិបាលសហភាពអឺរ៉ុប ចង់ជួយចាប់ផ្តើមការងើបឡើងវិញរបស់ស៊ីរី ប៉ុន្តែរដ្ឋធានីជាច្រើនក៏បានសង្កត់ធ្ងន់ថា អឺរ៉ុបគួរតែចាត់វិធានការបន្តិចម្តងៗ និងអាចបញ្ច្រាស់បានដើម្បីរក្សាអានុភាព ខណៈខ្លួនលើកទឹកចិត្តអាជ្ញាធរថ្មីក្នុងទីក្រុងដាម៉ាស ឱ្យគោរពសិទ្ធិជាមូលដ្ឋាន និងអនុវត្តគោលនយោបាយមានលក្ខណៈបរិយាបន្ន៕