បើតាមសមាជិករបស់យោធាអ៊ុយក្រែន បានឲ្យដឹងថា ទាហានកូរ៉េខាងជើងបានដកថយពីផ្នែកយ៉ាងហោចណាស់មួយនៃសមរភូមិជួរមុខ ក្នុងតំបន់ Kursk នៃប្រទេសរុស្ស៊ី។

សារព័ត៌មាន Sky News កាលពីថ្ងៃចន្ទ (ទី២៧ ខែមករា) បានរាយការណ៍ថា មេបញ្ជាការកងកម្លាំងពិសេសអ៊ុយក្រែន បានប្រាប់ឲ្យដឹងថា ទាហានរបស់មេដឹកនាំកូរ៉េខាងជើង លោក គីម ជុងអ៊ុន (Kim Jong Un) ដែលប្រយុទ្ធរួមគ្នាជាមួយទីក្រុងមូស្គូ បានដកចេញជាបណ្ដោះអាសន្នពីសមរភូមិជួរមុខ នៅតំបន់ Kursk បន្ទាប់ពីមានស្លាប់ និងរបួសយ៉ាងច្រើន។

ចំណែកសារព័ត៌មាន Kyiv Independent បានរាយការណ៍អមដោយសម្ដីរបស់លោកវរសេនីយ៍ឯក Oleksandr Kindratenko អ្នកនាំពាក្យនៃកងកម្លាំងប្រតិបត្តិការពិសេសរបស់អ៊ុយក្រែន ដែលបាននិយាយថា ទាហានរបស់លោក គីម ហាក់ដូចជាបានដកចេញពីផ្នែកមួយនៃសមរភូមិជួរមុខ នៅតំបន់ Kursk។

សារព័ទ៌មាន Newsweek បានទាក់ទងទៅបេសកកម្មអចិន្ត្រៃយ៍របស់កូរ៉េខាងជើង ប្រចាំអង្គការសហប្រជាជាតិ ដើម្បីសុំការអត្ថាធិប្បាយតាមរយៈអ៊ីម៉ែល កាលពីថ្ងៃចន្ទ ប៉ុន្តែមិនទាន់ទទួលបានការឆ្លើតតបនៅឡើយទេ។

គួរបញ្ជាក់ថា កូរ៉េខាងជើង បាន និងកំពុងផ្គត់ផ្គង់កាំភ្លើងធំ និងសព្វាវុធទូទៅមួយចំនួនធំដល់រុស្ស៊ី ហើយយោងតាមរបាយការណ៍ចារកម្មរបស់សហរដ្ឋអាមេរិក កូរ៉េខាងត្បូង និងអ៊ុយក្រែន បានឲ្យដឹងថា ប្រទេសមួយនេះបានបញ្ជូនទាហានប្រមាណពី ១០.០០០នាក់ ទៅ ១២.០០០នាក់ ទៅប្រទេសរុស្ស៊ី ក្នុងខែតុលា ឆ្នាំ២០២៤៕