មន្ត្រីអាមេរិក ២រូប បានប្រាប់សារព័ត៌មាន The Times of Israel ថា រដ្ឋបាលរបស់លោក Donald Trump បានធានាដល់ប្រទេសជាច្រើន នៅតំបន់មជ្ឈិមបូព៌ាថា ការផ្អាកដែលត្រូវបានធ្វើឡើង ចំពោះជំនួយពីសហរដ្ឋអាមេរិក នឹងត្រូវបានលុបចោលវិញ នៅប៉ុន្មានខែខាងមុខនេះ។

គួរបញ្ជាក់ថា កាលពីថ្ងៃសុក្រចុងសប្ដាហ៍កន្លងមក ក្រសួងការបរទេសបានផ្អាកជំនួយបរទេសស្ទើរតែទាំងអស់របស់សហរដ្ឋអាមេរិក ដោយលើកលែងតែចំពោះកម្មវិធីស្បៀងអាហារមនុស្សធម៌សង្គ្រោះបន្ទាន់ រួមជាមួយនឹងជំនួយយោធាដល់ប្រទេសអ៊ីស្រាអែល និងអេហ្ស៊ីបប៉ុណ្ណោះ។

ការបង្កកត្រូវបានគ្រោងមានរយៈពេល ៩០ថ្ងៃ ជាពេលដែលក្រសួងការបរទេស នឹងពិនិត្យមើលកម្មវិធីជំនួយដែលមានស្រាប់ទាំងអស់ និងកំណត់ថា តើវាសមស្របនឹងរបៀបវារៈគោលនយោបាយការបរទេសរបស់រដ្ឋបាលលោក Trump ដែរ ឬទេ។

ការសម្រេចរបស់ក្រសួងការបរទេស បានកើតឡើងបន្ទាប់ពីមានក្រឹត្យដែលចុះហត្ថលេខាដោយប្រធានាធិបតីអាមេរិក លោក Trump នៅថ្ងៃចូលកាន់តំណែងថ្ងៃដំបូងរបស់លោក នៅក្នុងការិយាល័យ ដោយអះអាងថា «ឧស្សាហកម្មជំនួយបរទេស និងការិយាធិបតេយ្យ មិនស្របតាមផលប្រយោជន៍របស់អាមេរិក ហើយក្នុងករណីជាច្រើនផ្ទុយនឹងតម្លៃរបស់អាមេរិក«។

តែយ៉ាងណាក្ដី មន្ត្រីរដ្ឋបាលមួយចំនួន បាន និងកំពុងធ្វើការ ដើម្បីធានាដល់សម្ព័ន្ធមិត្តមួយចំនួនរបស់សហរដ្ឋអាមេរិកថា ជំនួយរបស់ពួកគេ នឹងបន្តមានឡើងវិញ នៅពេលការត្រួតពិនិត្យត្រូវបានបញ្ចប់សព្វគ្រប់ ដោយបន្ថែមថា ប្រទេសដែលទទួលបានការប្តេជ្ញាចិត្តបែបនេះ រួមមានទាំងរដ្ឋាភិបាល នៅតំបន់មជ្ឈិមបូព៌ាផងដែរ។ ក្រសួងការបរទេសបានបដិសេធមិនឆ្លើយតបអ្វីឡើយ សម្រាប់សំណើសុំការអត្ថាធិប្បាយ ពាក់ព័ន្ធនឹងបញ្ហានេះ៕