ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃពុធ (២៩ មករា) នេះថា មេដឹកនាំកូរ៉េខាងជើង លោក គីម ជុងអ៊ុន បានអំពាវនាវឱ្យមានការពង្រឹងកងកម្លាំងនុយក្លេអ៊ែរនៅក្នុងឆ្នាំនេះ ក្នុងអំឡុងពេលទស្សនកិច្ចទៅកាន់មូលដ្ឋានផលិតសម្ភារៈនុយក្លេអ៊ែរ និងវិទ្យាស្ថានអាវុធនុយក្លេអ៊ែររបស់ប្រទេស។

ដំណើរចុះពិនិត្យរបស់លោក គីម ដែលបង្ហាញនូវកំណើនឃ្លាំងអាវុធនុយក្លេអ៊ែររបស់ប្រទេស បានកើតឡើងខណៈទីក្រុងព្យុងយ៉ាង បាននិងកំពុងបង្កើនការបង្ហាញកម្លាំង ជុំវិញការវិលចូលកាន់តំណែងរបស់លោកប្រធានាធិបតីអាមេរិក Donald Trump ជាមួយនឹងការសាកល្បងមីស៊ីលជាថ្មី ដែលកូរ៉េខាងត្បូង និយាយថាមួយផ្នែកគឺមានគោលបំណងទាក់ទាញចំណាប់អារម្មណ៍របស់លោក Trump។

KCNA រាយការណ៍ថា លោក គីម បានលើកសរសើរក្រុមអ្នកវិទ្យាសាស្រ្ត និងបុគ្គលិកផ្សេងទៀតចំពោះការសម្រេចបាននូវ "ជោគជ័យដ៏សំខាន់" និង "លទ្ធផលផលិតដ៏អស្ចារ្យ" កាលពីឆ្នាំមុន ខណៈអំពាវនាវឱ្យជោគជ័យបន្ថែមទៀតនៅឆ្នាំនេះ និងការពង្រឹងកងកម្លាំងនុយក្លេអ៊ែររបស់ប្រទេស។

ទីក្រុងព្យុងយ៉ាង បានប្រកែកជាយូរមកហើយថា ឃ្លាំងអាវុធនុយក្លេអ៊ែររបស់ខ្លួនគឺសំដៅដល់ការពារការគំរាមកំហែងពីទីក្រុងវ៉ាស៊ីនតោន និងសម្ព័ន្ធមិត្តរបស់ខ្លួនគឺកូរ៉េខាងត្បូង ដែលបានប្រយុទ្ធជាមួយកូរ៉េខាងជើង ក្នុងអំឡុងសង្គ្រាមកូរ៉េឆ្នាំ១៩៥០-១៩៥៣។ ក្រុមអ្នកវិភាគបានប៉ាន់ស្មានថា កូរ៉េខាងជើងអាចផលិតសម្ភារៈធាតុផ្សំគ្រប់គ្រាន់ ដើម្បីបង្កើតក្បាលគ្រាប់នុយក្លេអ៊ែររហូតដល់ ៩០គ្រាប់៕