ប្រជាជនភៀសខ្លួនប៉ាឡេស្ទីន បានបន្តដំណើរត្រឡប់ទៅផ្ទះសម្បែងរបស់ពួកគេវិញក្នុងទីក្រុងហ្កាហ្សា ក្នុងសប្តាហ៍នេះ ដោយបានរកឃើញទីក្រុងស្ថិតនៅក្នុងគំនរបាក់បែកបន្ទាប់ពីការប្រយុទ្ធគ្នាអស់រយៈពេល ១៥ខែ ខណៈមានមនុស្សជាច្រើនកំពុងស្វែងរកទីជំរកក្នុងចំណោមគំនរបាក់បែក និងស្វែងរកសាច់ញាតិដែលបាត់ខ្លួន ស្របពេលក្រុមអ្នកសម្រុះសម្រួលប្រឹងប្រែងគូសវាសដំណាក់កាលបន្ទាប់។

ជនភៀសខ្លួនមួយចំនួនបានទៅដល់ភាគខាងជើងហ្កាហ្សារួចហើយ ហើយកំពុងរកមើលកន្លែងស្នាក់នៅ ដោយមនុស្សរាប់ម៉ឺននាក់ទៀតនៅតែបន្តធ្វើដំណើរទៅភាគខាងជើង ខណៈអ្នកសម្របសម្រួលបានចាប់ផ្តើមការងារបឋមលើដំណាក់កាលទីពីរនៃកិច្ចចរចាបទឈប់បាញ់ ដែលនឹងចាប់ផ្តើមនៅសប្តាហ៍ក្រោយនេះ។

ទីក្រុងហ្កាហ្សា ស្ថិតនៅភាគខាងជើងនៃតំបន់ហ៊ុមព័ទ្ធ ធ្លាប់ជាតំបន់កណ្តាលទីក្រុងដ៏អ៊ូអរមុនពេលមានសង្រ្គាម ប៉ុន្តែឥឡូវនេះ អគារជាច្រើនត្រូវបានបំផ្លាញដោយការទម្លាក់គ្រាប់បែករបស់អ៊ីស្រាអែល និងគំនរកម្ទេចថ្ម និងបេតុងដែលបាក់បែកនៅគ្រប់ផ្នែកទាំងអស់។

គិតត្រឹមយប់ថ្ងៃចន្ទ អាជ្ញាធរក្រុមហាម៉ាស របស់តំបន់ហ្កាហ្សាបាននិយាយថា មនុស្សជាង ៣០០.០០០នាក់ ឬស្ទើរតែពាក់កណ្តាលនៃជនភៀសខ្លួនពីភាគខាងជើងក្នុងអំឡុងពេលសង្រ្គាម បានឆ្លងចូលទៅក្នុងទីក្រុងហ្កាហ្សា និងជាយខាងជើងនៃតំបន់ហ៊ុមព័ទ្ធពីតំបន់នានានៅភាគខាងត្បូង៕