អ្នកសារព័ត៌មានរបស់ប្រទេសប៉ាគីស្ថាន រាប់រយនាក់បានមកប្រមូលផ្តុំគ្នា កាលពីថ្ងៃអង្គារ ប្រឆាំងច្បាប់ដែលបានស្នើឡើងដើម្បីរឹតត្បិតខ្លឹមសារបណ្តាញផ្សព្វផ្សាយសង្គម ដែលពួកគេនិយាយថាមានគោលបំណងទប់ស្កាត់សេរីភាពសារព័ត៌មាន និងគ្រប់គ្រងទិដ្ឋភាពឌីជីថល។

ច្បាប់នេះ នឹងបង្កើតការអាជ្ញាធរនិយ័តកម្ម ដែលនឹងមានទីភ្នាក់ងារស៊ើបអង្កេត និងតុលាការពិសេស។ អ្នកទាំងឡាយដែលត្រូវបានគេរកឃើញថា បានផ្សព្វផ្សាយព័ត៌មានមិនពិត ឬក្លែងបន្លំ ត្រូវប្រឈមនឹងការជាប់ពន្ធនាគាររហូតដល់៣ឆ្នាំ និងពិន័យជាប្រាក់ចំនួន២លានរូពី ឬ(៧.២០០ដុល្លារ)។

សហភាពសហព័ន្ធអ្នកសារព័ត៌មានប៉ាគីស្ថាន បានដឹកនាំការប្រមូលផ្តុំគ្នានៅក្នុងទីក្រុងជាច្រើន រួមទាំងទីក្រុងអ៊ីស្លាម៉ាបាដ ការ៉ាជី និងទីក្រុងឡាហ័រ ដើម្បីទាមទារឱ្យរដ្ឋាភិបាលដកសេចក្តីស្នើច្បាប់នេះដែលត្រូវបានអនុម័តដោយសភា ប៉ុន្តែពុំទាន់ត្រូវបានចុះហត្ថលេខាដោយប្រធានាធិបតី នៅឡើយ។

អ្នកសារព័ត៌មាន លោក Sami Abraham បាននិយាយថា «នៅក្រោមច្បាប់ថ្មី ដែលរដ្ឋាភិបាលកំពុងព្យាយាមដាក់ សិទ្ធិជាមូលដ្ឋានត្រូវបានដកចេញពីប្រជាជនប៉ាគីស្ថានទាក់ទងនឹងសេរីភាពនៃការបញ្ចេញមតិ»។

ប្រធានសហភាពសហព័ន្ធអ្នកសារព័ត៌មានប៉ាគីស្ថាន លោក Afzal Butt បាននិយាយក្នុងពេលប្រមូលផ្តុំគ្នាក្នុងទីក្រុង Islamabad មុនពេលនគរបាលរារាំងលោក និងក្រុមបាតុករផ្សេងទៀតពីការដង្ហែរក្បួនទៅកាន់តំបន់ក្រហម ដែលមានការិយាល័យរបស់នាយករដ្ឋមន្រ្តី សភា និងការិយាល័យការទូតថា «ចលនារបស់យើង នឹងបន្តរហូតដល់យើងស្លាប់ ឬច្បាប់ខ្មៅនេះត្រូវបានដកចេញវិញ»។

ប្រព័ន្ធផ្សព្វផ្សាយឌីជីថលនៅក្នុងប្រទេសប៉ាគីស្ថាន ត្រូវបានរំខានរួចហើយដោយវិធានការរបស់អាជ្ញាធរទូរគមនាគមន៍ ដើម្បីបន្ថយល្បឿនអ៊ីនធឺណិត ហើយវេទិកាបណ្តាញផ្សព្វផ្សាយសង្គម X ត្រូវបានបិទ រយៈពេលជាងមួយឆ្នាំមកហើយ។ អង្គការអ្នកសារព័ត៌មានគ្មានព្រំដែន ដែលជាអង្គការការពារសេរីភាពសារព័ត៌មាន បានដាក់ចំណាត់ថ្នាក់ប្រទេសប៉ាគីស្ថាន នៅលេខ១៥២ ក្នុងចំណោមប្រទេស១៨០ នៅលើសន្ទស្សន៍សេរីភាពសារព័ត៌មានពិភពលោកឆ្នាំ២០២៤ របស់ខ្លួន។